İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 468 Hüküm no: 407 Orijinal metin no: [158-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden tacir Mahmud Efendi’ye borcu olan Çenesizoğlu Hüseyin Ağa’nın borcunu vârislere ödemeyi taahhüt ettiği 7578 [guru]ş edâya ta‘ahhüd Ma‘rûz Hayriye tüccârından olup İstanbul’da Uzunçarşı civârında Bezzâz-ı cedîd mahallesinde sâkin iken işbu sene-i mübâreke şehr-i Rebî‘ülevvelinin üçüncü günü vefât eden es-Seyyid el-Hâc Mahmud Efendi b. İbrahim’in verâseti zevce-i menkûha-i metrûkesi Şerife Zekiye Hanım bt. es-Seyyid el-Hâc İsmail ile sulbî kebîr oğlu es-Seyyid el-Hâc İbrahim Edhem Efendi’ye ba‘de’l-inhisâr nefsinden asıl ve vâlidesi zevce-i mezbûre Şerife Zekiye Hanım tarafından husûs-ı âti’l-beyânda vekîl-i sâbitü’l-vekâlesi derûn-ı arzuhâlde <> mezkûrü’l-ism ibn-i mezbûr es-Seyyid el-Hâc İbrahim Edhem Efendi meclis-i şer‘-i enverde tüccâr sefâini kapudanlarından sâhib-i arzuhâl Çenesizoğlu Hüseyin Ağa b. Süleyman muvâcehesinde pederim ve mûrisim müteveffâ-yı mezbûr es-Seyyid el-Hâc Mahmud Efendi ile hayatında mezbûr Hüseyin Ağa’nın münâsafeten mâlik oldukları birik ta‘bîr olunur iki direkli bir kıt‘a sefînelerinde mezbûr Hüseyin Ağa Kapudan ve reis ve pederim mezbûrun hissesine navl ta‘bîr olunur ücretle tahmîl-i hamûleye ve rü’yet-i mesârife dahi vekîli olmağla kapudan-ı mezbûrun sene-i sâbıkā yani bin iki yüz elli yedi senesi Muharremi’l-harâmı gurresinden sene-i merkūme Şa‘bâni’l-mu‘azzamı’nın on altıncı gününe gelince pederim müteveffâ-yı mezbûrun navl-ı sefînede olan hissesinden ve mesârif için polatka nâmıyla mâlından makbûz ve hissesine iktizâ eden masrûfunun ve pederim mezbûrun mâlından emr ve tevkîliyle âhara bey‘ ü teslîm eylediği kokoroz semeninden makbûzunun hesâbı mezbûr Hüseyin Ağa ile ber-mûceb-i derkenâr hâlâ Galata’da Kurşunlumahzen nâm mahâlde vâki‘ liman odasında yegân yegân hesâb-ı sahîh ve ehl-i vukūf ma‘rifetiyle rü’yet olundukda gayrı ez mesârif lede’l-muhâsebe navl-ı sefîne ve polatka ve semen-i mezkûrdan benimle vâlidem ve müvekkilem mezbûre Şerife Zekiye Hanım’ın müteveffâ-yı mezbûrdan mevrûs olarak yedi bin beş yüz yetmiş sekiz guruş mezbûr Hüseyin Ağa zimmetinde alacak hakkımız zuhûr ve mezbûr Hüseyin Ağa ikrâr-ı kat‘î ile ikrâr dahi etmekle meblağ-ı mezkûr yedi bin beş yüz yetmiş sekiz guruşu işbu târih-i i‘lâmdan bir sene mürûrunda benimle müvekkilem mezbûreye tamamen edâ ve teslîme ta‘ahhüd etmekle meblağ-ı merkūmdan mâ‘adâ bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 27 B sene [12]58