İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 476 Hüküm no: 411 Orijinal metin no: [161-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap dükkânı gediğine ait hisse satışı Kasab Ma‘rûz Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla altıncı selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’da Hacı mahallesinde Papasköprüsü nâm mahâlde Kunduracı Nikola zimmî dükkânı ve Fermeneci Nikoli zimmî menzili beynlerinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin sülüs hissesine bâ-temessük-i mütevellî bi’l-icâreteyn mutasarrıf olan İstirati v. Petro zimmî meclis-i şer‘-i hatîrde kasab tâifesinden bâ‘isü’l-i‘lâm Petro v. Dimitri zimmî muvâcehesinde hâlâ kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben âlât-ı gedik-i merkūmdan sâlifü’l-beyân mutasarrıf olduğum sülüs hissenin nısfını uhdemde ibkā edip mâ‘adâ nısfını hüsn-i rızâ ve tayyib-i hâtırım ve ferâğ-ı mu‘teber-i kat‘î ile mersûm Petro zimmîye bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve hisse-i tevzî’ini müdîr ve kasab ustaları ma‘rifetleriyle almağa ta‘ahhüd edip fîmâ-ba‘d gedik-i mezkûrun nısf an-sülüs hisse-i merkūmesi mesfûr Petro zimmînin hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun nısf an-sülüs hissesi fâriğ-i mersûm İstirati zimmînin ferâğından defter-i vakf-ı şerîfde mersûm Petro zimmî uhdesine kayd ve der-dest olan temessük-i mezkûrdan ifrâz birle şerh verilip ve gedik-i mezkûrun nısf hissesine dahi mersûm Petro zimmî diğer bir kıt‘a temessük-i mütevellî ile bi’l-icâreteyn hâlâ mutasarrıf olmağla temessüğü hâmişine işbu nısf an-sülüs hissenin dahi zabt ü tasarrufi’çün taraf-ı vakfdan tahrîr ve temhîr buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 2 Ş sene [1]258