İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 477 Hüküm no: 412 Orijinal metin no: [161-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey’in Mehmed Seyda Bey’den alacaklı olduğu yolundaki iddiasını ispatlayamadığı Esb men‘i Ma‘rûz Sâhib-i arzuhâl İsmail Bey b. el-müteveffâ ebniye-i hâssa müdîri esbak Mahmud Efendi meclis-i şer‘-i münîrde mukaddemâ kaynı hâcegân-ı Dîvân-ı hümâyûndan ve mektûbî-i Sadr-ı âlî hulefâsından derûn-ı arzuhâlde mezkûrü’l-ism Mehmed Seyda Bey b. Mehmed Âtıf Bey ibnü’l-merhûm Hasan Tahsin Efendi tarafından husûs-ı âti’l-beyânda vekâleti Ahmed Ağa b. Mustafa ve Mustafa Ağa b. Mustafa nâm kimesneler şehâdetleriyle ber-nehc-i şer‘î sâbit olan Osman Ağa b. Mustafa muvâcehesinde postahâne ketebesinden el-Hâc Mehmed Râşid Bey b. Mehmed Salih hâzır olduğu hâlde müvekkil-i mûmâ-ileyh Mehmed Seyda Bey zimmetinde bin iki yüz elli dört senesi Cumâdelâhiresinin on yedinci günü mâlımdan ve yedimden iştirâ ve kabz eylediği bir re’s kula esb semeninden sekiz bin guruş ve işbu sene-i mübâreke şehr-i Rebî’ülâhirinin üçüncü günü dahi yine mâlımdan ve yedimden iştirâ ve kabz eylediği bir şalî araba perdesi semeninden dahi altı yüz guruş ki cem‘an sekiz bin altı yüz guruş alacağım olmağla meblağ-ı mecmû‘-ı merkūmu müvekkil-i mûmâ-ileyhden hâlâ taleb ederim deyü da‘vâ ettikde vekîl-i mezbûr Osman Ağa dahi cevâbında müvekkil-i mûmâ-ileyh Mehmed Seyda Bey târih-i merkūmda müdde‘î-i mezbûr İsmail Bey’den zikr olunan esbi ancak beş yüz guruşa iştirâ ve kabz eylediğini bi’l-vekâle ikrâr ve müdde‘î-i mezbûrun ber-vech-i muharrer mâ‘adâ müdde‘âlarını inkârından mâ‘adâ müvekkilim mûmâ-ileyhin müdde‘î-i mezbûr zimmetinde bi-şarti’r-rücû‘ emriyle bâ-defter-i müfredât umûr-ı ma‘lûmesine mâlından masrûfu olan dört bin guruş alacak hakkı olup sâlifü’l-beyân şehr-i Rebî‘ülâhirin on beşinci günü semen-i mezkûr beş yüz guruşu deyn-i merkūm dört bin guruşun ol-mikdârına ba‘de’t-takas ve’l-mukāssa ve’l-kabûl bâkīsi olan üç bin beş yüz guruş mutâlebesinden dahi müdde‘î-i mezbûrun zimmetini kabûlünü hâvî ibrâ ve iskāt eylediğinden mâ‘adâ yedimde olup sene-i mübâreke-i merkūme Cumâdelâhiresinin yirmi yedinci günü târihiyle müverrah İstanbul Mahkemesi’nden verilen işbu bir kıt‘a i‘lâm-ı şer‘î nâtık olduğu üzere müdde‘î-i mezbûr İsmail Bey tarafından ber-vech-i âtî vekîl-i müsecceli olan hâzır-ı mezbûr el-Hâc Mehmed Râşid Bey târih-i i‘lâm-ı merkūma gelince cemî‘ hukūk-ı şer‘iyeye müte‘allika âmme-i de‘âvîden müvekkilim mûmâ-ileyhin zimmetini kabûlünü hâvî ibrâ-i âmm-ı sahîh-i şer‘î ile müvekkili müdde‘î-i merkūm İsmail Bey’e izâfetle bi’l-vekâle ibrâ ve iskāt etmiş idi deyü mazmûnu takrîr-i meşrûhuna mutâbık bir kıt‘a i‘lâm-ı şer‘î ibrâz ve hâzır-ı mezbûr el-Hâc Mehmed Râşid Bey dahi tasdîkiyle bi’l-vekâle eylediği def‘ini ve mazmûn-ı i‘lâm-ı mezkûru müdde‘î-i mezbûr İsmail Bey bi-tamamihi tâyi‘an ve kat‘iyyen ikrâr ü i‘tirâf etmeğin mûcebince müdde‘î-i mezbûr İsmail Bey da‘vâ-yı mezkûresiyle müvekkil-i mûmâ-ileyh Mehmed Seyda Bey’e bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 3 Ş sene [12]58