İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 478 Hüküm no: 413 Orijinal metin no: [162-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf aşçı ve şerbetci ve salatacı dükkânı ile gedik hisselerinin kiralanması 3380 [guru]ş edâya ta‘ahhüd [Ma‘rûz] Vilâyet-i Anadolu’da Nevşehir Kazâsı’na tâbi‘ Ortahisâr karyesi ahâlisinden olup nefsinden asıl ve hâlâ karye-i mezkûrede sâkinler li-ebeveyn ammi İdris Ağa b. Memiş ve eniştesi es-Seyyid Mehmed Tâhir Ağa b. Hasan taraflarından husûs-ı âti’l-beyânda vekîlleri olduğu İbrahim Ağa b. Mahmud ve Feyzullah Ağa b. Abdullah nâm kimesneler şehâdetleriyle ber-nehc-i şer‘î sâbit olan es-Seyyid İbrahim Ağa b. el-müteveffâ Ali b. el-mezbûr Memiş kebâbcı ve aşçı esnâfından Yorgi v. Kiryako zimmî hâzır olduğu hâlde meclis-i şer‘-i münîrde esnâf-ı mezkûre mütevellîsi bâ‘isü’l-i‘lâm Ali Ağa b. Ahmed muvâcehesinde esnâf-ı mezkûre Kethudâsı es-Seyyid Ali Ağa ve Yazıcısı İsmail Efendi ve esnâf-ı mezkûreden Halil Ağa ve diğer Halil Ağa ve İbrahim Ağa ve Yiğitbaşı el-Hâc Ebûbekir Ağa nâm kimesneler ile Harim ve Kiryako ve Todori nâm zimmîler hâzır oldukları hâlde İstanbul’da Bahçekapısı hâricinde Hidayet Câmi‘-i şerîfi karşısında kâin ma‘lûmü’l-hudûd bir bâb vakıf aşçı ve şerbetçi ve salatacı dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmeden her biri yüz yirmişer <> sehm i‘tibârıyla kırk beş sehm hisse-i şâyi‘aları benim ve altmış sehm hisse-i şayi‘aları ammim ve müvekkilim mezbûr İdris Ağa’nın ve on beş sehm hisse-i şâyi‘aları dahi eniştem ve diğer müvekkilim mezbûr es-Seyyid Mehmed Tâhir Ağa’nın bâ-temessükât-ı mütevellî bi’l-icâreteyn taht-ı tasarrufumuzda olup hâzır-ı mersûm Yorgi zimmî dükkân ve âlât-ı gedik-i merkūmlarda müsâneheten müstecirimiz iken işbu sene-i mübârekede duhûl eden Ağustos’un on dördüncü günü müddet-i icâre tamam ve munkaziye oldukda ben bi’l-asâle ve bi’l-vekâle zikr olunan Ağustos’un on altıncı gününden i‘tibâr ile iki sene tamamına değin mecmû‘ dükkân ve gedik-i merkūmları yine hâzır-ı mesfûr Yorgi zimmîye iki bin altı yüz guruşa îcâr ol dahi ber-vech-i muharrer istîcâr ve kabûl ve icâre-i mezkûresi olan iki bin altı yüz guruşu dahi ber-vech-i peşîn yedinden tamamen ahz u kabz etmiş isem de el-hâletü hâzihî bi’t-terâzî fesh-i icâre birle dükkân-ı mezkûru tahliye ve gedik-i merkūm ile mâ‘an bana teslîm ben dahi kabz eylediğimden sonra makbûzum olan meblağ-ı merkūm iki bin altı yüz guruşu tamamen hâzır-ı mersûma redd ü teslîme ve dükkân-ı mezkûra bilâ-emr kendi mâlından masrûfu olan iki yüz elli guruşu dahi mâlımdan teberru‘an kendine vermeye ta‘ahhüd eylediğimden mâ‘adâ ben dükkân ve gedik-i mezkûrları işbu târih-i i‘lâm şehri Şa‘bâni’l-mu‘azzamı gurresinden i‘tibâr ile iki seneliği üç bin üç yüz seksen guruşu hâlâ bana vermek üzere mezbûr Ali Ağa’ya bi’l-asâle ve bi’l-vekâle îcâr ve teslîm eylediğimde ol dahi minvâl-i muharrer üzere istîcâr ve kabûl ve icâre-i mezkûresi olan üç bin üç yüz seksen guruşu dahi ber-vech-i muharrer bana teslîme ta‘ahhüd edip bu vechile kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî-gurreti Ş sene 1258