İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 479 Hüküm no: 414 Orijinal metin no: [162-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun’un vefat eden kız kardeşinin emanet bıraktığı para ve altınlarını Sarraf Nikagos’un zabtettiği yolundaki iddiasını ispatlayamadığı Mazbata kaydı Ma‘rûz-ı dâ‘î[leridir ki] İstanbul’da Eğrikapı dâhilinde Molla Aşkī mahallesinde sâkine iken sene-i sâbıkā yani bin iki yüz elli yedi senesi Zilka‘detü’ş-şerîfesinin on yedinci günü fevt olan Şerife Fatıma Hanım bt. es-Seyyid Mehmed b. Abdullah’ın li-ebeveyn kız karındaşı ve hasran vârisesi sâhibe-i arzuhâl mu‘arrefetü’z-zât Şerife Âişe Hatun Çarşamba günü huzûr-ı feyz-zuhûr-ı cenâb-ı mu‘allâ-elkāb-ı Fetvâ-penâhî’de ma‘kūd meclis-i şer‘-i münîrde sarrâf tâifesinden derûn-ı arzuhâlde ismi mastûr Mumcuoğlu Nikefos v. Arakil zimmî muvâcehesinde mersûm Sarrâf Nikefos zimmînin yedinde olup huzûr-ı hazret-i müşârün-ileyhde ibrâz eylediği bin iki yüz elli dört senesi şehr-i Rebî‘ülevvelinin altıncı günü târihiyle müverraha Mahmudpaşa Mahkemesi nâibi bulunan mevâlî-i i‘zâmdan fazîletlü Hemşinî İbrahim Efendi verip mahkeme-i mezkûre sicill-i mahfûzundan kaydı ihrâc olunan bir kıt‘a hüccet-i şer‘iye nâtık olduğu üzere kız karındaşım ve mûrisem müteveffât-ı mezbûre Şerife Fatıma Hanım’ın hayatında İstanbul Emti‘ası Gümrüğü Mukāta‘ası’ndan bâ-berât-ı âlî-şân mutasarrıfe olduğu sehmin senevî bin beş yüz elli üç buçuk ve Çanlı? Mukāta‘ası’ndan kezâlik bâ-berât mutasarrıfe olduğu hissenin senevî iki yüz elli guruş ve Üsküb Mukāta‘ası’ndan yine bâ-berât mutasarrıfe olduğu hissenin senevî kezâlik iki yüz elli guruş ve Filibe Nezâreti Mukāta‘ası’ndan kezâlik bâ-berât mutasarrıfe olduğu senevî yüz altmış altı buçuk guruş ki cem‘an senevî iki bin iki yüz yirmi guruş fâizlerinden olarak bin iki yüz kırk dokuz senesinden sâlifü’l-beyân bin iki yüz elli dört senesine gelince beş senede vakıf taksîtleri hulûllerinden cem‘an on bir bin yüz guruşu mahallerinden sarrâf-ı mersûm kız karındaşım mezbûre Şerife Fatıma Hanım’ın izniyle kız karındaşım mezbûre için ahz u kabz ettikden sonra ber-vech-i muharrer makbûzu olan meblağ-ı mecmû‘-ı merkūm on bir [bin] yüz guruşu kız karındaşım mezbûreye def‘ ve teslîm ol dahi yedinden tamamen ahz u kabz edip meblağ-ı mecmû‘-ı mezkûrdan mersûm Nikefos zimmî yed ve zimmetinde bir akçe ve [bir] habbe alacağı kalmamağla husûs-ı mezkûra müte‘allika da‘vâdan mersûm Nikefos zimmînin kabûlünü hâvî zimmetini ibrâ ve iskāt etmekle bundan mâ‘adâ müteveffât-ı mezbûre Şerife Fatıma Hanım hayatında bin iki yüz elli üç senesi Saferi’l-hayrı gurresinde mâlından beheri beşer yüz guruşdan cem‘an altı bin guruşluk on iki ade[d] kebîr Emrudî boyun altını ile otuz bin guruş nakdini mersûm Nikefos zimmîye li-ecli’l-hıfz îdâ‘ ve teslîm ol dahi ber-vech-i muharrer yedinden ahz u kabz ve ba‘dehû zikr olunan altınlar ile nakd-i merkūmu kable’l-ahz kız karındaşım mezbûre fevt ve cümlesi ancak bana mevrûs olup cümlesi sarrâf-ı mersûm yedinde kalmağla bi’l-verâse hâlâ taleb ederim deyü da‘vâ ettikde mersûm Nikefos zimmî dahi cevâbında müdde‘iye-i mezbûre Şerife Âişe Hatun’un müdde‘âsını inkâr etmekle müdde‘i[ye]-i mezbûr da‘vâ-yı mezkûresini isbât için huzûr-ı hazret-i müşârün-ileyhe ikāmet eylediği mahalle-i mezkûre ahâlisinden iki nefer kimesneler da‘vâ-yı mezkûresine mutâbık edâ-yı şehâdet-i şer‘iye edememeleriyle makbûle olmayıp müdde‘i[ye]-i mezbûre Âişe Hatun işbu sene-i mübâreke Cumâdelûlâsı’nın altıncı günü âhar şâhid ikāmesine havâle olunup tarafeyn bir daha zuhûr etmemeleriyle henüz da‘vâlarına faysal verilmediği vekāyi‘-i şer‘iye kâtibimiz cerîdesinde mazbût olduğu İstanbul Mahkemesi’nden huzûr-ı [âlîlerine i‘lâm olundu] Fî 8 Ş sene [1]258