İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 480 Hüküm no: 415 Orijinal metin no: [163-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadinko bt. Sekyas’ın daha önce Ohannes ve hanımı Filyana’ya sattığı bir evi ile bahçesinin borcunu ödediğinden kendisine teslim edilmesi İki bâb menzil nizâ‘ı Ma‘rûz Arzuhâl eden Kadinko bt. Sekyas v. Atam Nasrâniye tarafından husûs-ı âti’l-beyânda vekîl olduğu şahs-ı mersûmeyi bilirler Çukacı Rapayel v. Andon ve Kuyumcu Artin v. Sekyas nâm zimmîler şehâdetleriyle ber-nehc-i şer‘î sâbit olan Berber Sahyos v. Diyon zimmî bi’l-ma‘iyye rü’yete memûr Evkāf Müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde meclis-i şer‘-i münîrde derûn-ı arzuhâlde isimleri mastûr olup nefsinden asıl ve zevcesi Filyana bt. Bedros v. <> Atam Nasrâniye tarafından husûs-ı câi’z-zikrde vekâleti şahsını ârifân Numan Ağa b. Mehmed ve Hasan Ağa b. Hüseyin nâm kimesneler şehâdetleriyle kezâlik sâbit olan Darbhâne-i âmire amelesinden Ohannes v. Serope zimmî muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm Abdi Efendi Vakfı’nın kāimmakām-ı mütevellîsi ecille-i ricâl-i Devlet-i aliyyeden hâlâ Evkāf-ı Hümâyûn Nâzırı sa‘âdetlü Mustafa Kânî Beyefendi taraflarından mürsel vekilleri Hüseyin Ağa b. Mustafa ve mahrûse-i Galata hâricinde Beyoğlu nâm mahâlde vâki‘ Üçhoran nâm Ermeni Kilisesi Vakfı’nın mütevellîsi Papa Artin v. Atam zimmî tarafından dahi vekîl-i şer‘îsi Câbî-i vakf Natos v. Serkiz zimmî hâzır oldukları hâlde her biri ma‘lûmü’l-hudûd olup asıl ve vekîl-i mersûm Ohannes zimmî ve zevcesi ve müvekkilesi mesfûre Filyana Nasrâniye bâ-temessük-i mütevellî bi’l-icâreteyn ale’l-iştirâki’s-seviyy mutasarrıf oldukları merhûm-ı merkūm Abdi Efendi Vakfı müsakkafâtından mahrûse-i mezkûreye muzâfe kasaba-i Kasımpaşa’da Ketehorya nâm mahâlde kâin bir bâb vakıf menzil ile zevc-i mersûm bâ-temessük-i mütevellî bi’l-icâreteyn müstakıllen mutasarrıf olduğu kilise-i mezkûr vakfı müsakkafâtından yine kasaba-i mezkûrede Kādı Mehmed Efendi mahallesinde İkikuyu nâm mahâlde kâin bir bâb vakıf bahçeyi bin iki yüz elli üç senesi şehr-i Rebî‘ülevvelinin altıncı günü müvekkilem mesfûre Kadinko Nasrâniyenin mâlından ve yedinden mâ‘an karz aldıkları dört bin guruş deynleri mukābelesinde müvekkilem mersûmeye vefâen bâ-re’y-i mütevellî ferâğ ve tefvîz ve teslîm ettiklerinde ol dahi ber-vech-i muharrer tefevvüz ve teslîm [tesellüm] ve kabûl etmeleriyle el-hâletü hâzihî deyn-i merkūm dört bin guruş müvekkilem mersûmeye edâ birle menzil ve bahçe-i mezkûrları bâ-re’y-i mütevellî geri tefevvüzüne zevcân-ı asıl ve müvekkile-i mersûmât Ohannes zimmî ve Filyana Nasrâniyeye ve bin iki yüz elli dört senesi Zilhiccesinin on dördüncü günü bana? asıl zevc-i mersûm Ohannes zimmînin müvekkilem mersûmenin mâlından [ve] yedinden bâ-tahvîl ikrâz ve kabz eylediği beş yüz guruş dahi zimmetinde müvekkilem mersûmenin alacak hakkı olmağla meblağ-ı merkūm beş yüz guruşu dahi edâya asıl-ı mersûma tenbîh olunmak murâdımdır deyü bi’l-vekâle da‘vâ ettikde asıl ve vekîl-i mesfûr Ohannes zimmî dahi cevâbında kaziyye minvâl-i meşrûh üzere olduğunu bi’l-asâle ve bi’l-vekâle tâyi‘an ve kat‘iyyen ikrâr ve i‘tirâf etmeğin mûcebince deyn-i merkūm dört bin guruşu müdde‘î-i vekîl-i mesfûr Sahyos zimmîye edâ ile menzil ve bahçe-i mezkûrları müvekkile-i mersûme Kadinko Nasrâniyeden bâ-re’y-i mütevellî geri tefevvüze müvekkile-i mersûme Filyana Nasrâniyeye izâfetle vekîl ve asıl zevc-i mersûm Ohannes zimmîye tenbîh olunup meblağ-ı mezkûr beş yüz guruşun dahi müdde‘î-i vekîl-i mersûm Sahyos zimmîye edâsıyla mersûm Ohannes zimmî ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 3 Ş sene [1]258