İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 481 Hüküm no: 416 Orijinal metin no: [163-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Çiçekçioğlu Rafayil’in Kirhor’a açtığı alacak davasında sulh oldukları Ma‘rûz Katolik milletinden olup arzuhâl eden Çukacı Çiçekcioğlu Rafayil v. Andon zimmî Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde yine millet-i mersûmeden li-ebeveyn ammioğlu derûn-ı arzuhâlde ismi mastûr Şekerlemeci Kirhor v. Bedros zimmî muvâcehesinde mersûm Kirhor zimmî zimmetinde bin iki yüz elli dört senesi hilâlinde mâlımdan ve yedimde karz aldığı dört bin guruş ve bin iki yüz elli altı senesi hilâlinde bi-şarti’r-rücû‘ emriyle hâlâ mutasarrıf olduğu mahrûse-i Galata’ya muzâfe Ortaköy’de Dereiçi nâm mahâlde vâki‘ bir bâb şekerlemeci dükkânının müceddeden binâ ve inşâsına bâ-defter-i müfredât mâlımdan masrûfum olan on bin iki yüz elli guruş ve Çengelkaryeli Dimitri v. Atam nâm zimmîye deyni olup kezâlik emriyle mâlımdan edâ eylediğim beş bin guruş ve menzil kirâsından Aşçı Avanis v. Dimitri nâm zimmîye deyni olup kezâlik emriyle mâlımdan edâ eylediğim altı yüz guruş ve Şekerci Ohannes v. Artin nâm zimmîye deyni olup kezâlik emriyle mâlımdan edâ eylediğim bin guruş ve yine bi-şarti’r-rücû‘ emriyle âhardan iştirâ ve kendine teslîm eylediğim bâ-defter-i müfredât dükkân-ı mezkûr takımı ve şekerlemeci binâsı semenlerine mâlımdan medfû‘um olan yedi bin altı yüz seksen altı guruş ki cem‘an yirmi sekiz bin beş yüz on altı [164] guruş mersûm Kirhor zimmîden da‘vâ sadedinde iken milâd-ı hazret-i İsa’nın bin sekiz yüz kırk bir senesi Teşrîn-i sânîsinin yirmi yedinci günü ki sene-i Arabiye’nin bin iki yüz elli yedi senesi Şevvâli’l-mükerreminin yirmi beşinci günü mahrûse-i mezkûrede vâki‘ Katolik Patrikhânesi’nde da‘vâ-yı mezkûremden mersûm Kirhor zimmî ile an-inkârin kat‘a li’n-nizâ‘ bi’t-terâzî altı bin otuz altı guruş üzerine sulh olup ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan mersûm Kirhor zimmînin zimmetini ibrâ ve iskāt eylediğimde ol dahi ibrâ-i mezkûru kabûl ve bedel-i sulh-ı mezkûr altı bin <>? otuz altı guruş zimmetinde bana sahîhan deyni olduğunu ikrâr ve mârrü’l-beyân Teşrîn-i sânînin yirmi yedinci günü târihiyle müverrah karz ünvânıyla yedime Ermeniyyü’l-imlâ işbu bir kıt‘a tahvîl dahi vermekle bedel-i sulh-ı mezkûr altı bin otuz altı guruşu mesfûr Kirhor zimmîden hâlâ taleb ederim deyü da‘vâ ettikde ol dahi cevâbında müdde‘î-i mersûm Rafayil zimmînin ber-vech-i muharrer müdde‘âsını inkârından mâ‘adâ sâlifü’l-beyân bin iki yüz elli dört senesinde İstanbul’da Uzunçarşı’da müdde‘î-i mersûmun mağazasında mâlımdan yirmi iki bin beş yüz guruş nakdimi müdde‘î-i mezbûr Rafayil zimmîye li-ecli’l-hıfz îdâ‘ ve teslîm eylediğimde ol dahi ber-vech-i muharrer yedimden ahz u kabz ve mârrü’z-zikr bin iki yüz elli altı senesi Şevvâlinin beşinci gününden sene-i merkūme Zilhiccetü’ş-şerîfesi gāyetine değin mâlımdan ceste ceste cem‘an on dört bin üç yüz on sekiz guruş nakdimi dahi müdde‘î << mersûm inkâr etmekle mesfûr Kirhor>> mersûma kezâlik li-ecli’l-hıfz îdâ‘ ve teslîm ol dahi ahz u kabz edip cümlesi müdde‘î-i mersûm Rafayil zimmî yedinde kalmağla hâlâ taleb ederim deyü eylediği da‘vâsı dahi müdde‘î-i mersûm inkâr etmekle mesfûr Kirkor zimmî da‘vâ-yı mezkûresiyle beyâna ba‘de’l-havâle müdde‘î-i mersûm Rafayil zimmî da‘vâ-yı mezkûresini Patrikhâne-i mezkûr yazıcılarından Bedros v. Kogas ve millet muhtârı Andon v. Bogos nâm zimmîler şehâdetleriyle huzûr-ı hazret-i Fetvâ-penâhî’de bi’l-muvâcehe ber-nehc-i şer‘î isbât ettikde mersûm Kirhor zimmî şâhidân-ı mersûmânın müstakīm ve eyledikleri şehâdetlerinde sâdıklar olduklarını ikrâr ve tasdîk etmeğin mûcebince bedel-i sulh-ı mezkûr altı bin otuz altı guruşun müdde‘î-i mersûm Rafayil zimmîye edâsıyla mesfûr Kirhor zimmî ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 7 Ş sene [1]258