İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 483 Hüküm no: 417 Orijinal metin no: [164-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trabzonlu Hasan’ın alacak iddiasıyla İsmail Ağa’ya açtığı davada haksız bulunduğu Ma‘rûz Mübârek ve mes‘ûd rikâb-ı kamer-tâb-ı merâhim-nisâb-ı şâhâneye takdîm-i arzuhâl eden Trabzonlu Hasan b. İsmail Çarşamba günü huzûr-ı cenâb-ı mu‘allâ-elkāb-ı Fetvâ-penâhî’de ma‘kūd meclis-i şer‘-i münîrde Dergâh-ı mu‘allâ kapıcıbaşılarından sâbıkā Drama Nâzırı derûn-ı arzuhâlde mezkûrü’l-ism İsmail Ağa b. Mustafa muvâcehesinde bin iki yüz otuz senesi hilâlinde İstanbul’da Çakmakçılar sûkunda vâki‘ Büyükyenihan’da mütemekkin sarrâf tâifesinden Abraham nâm zimmîye cihet-i karzdan deynim olan üç bin guruşa mûmâ-ileyh İsmail Ağa kefîl ve zâmin oldukdan sonra benim Kurşunlumağaza nâm mahâlde sâkin Sarı Ebûbekir nâm kimesne zimmetinde olan bin yedi yüz elli guruş ve Bâb-ı Câferî’de sâkin Balmumcu Paşa nâm kimesne zimmetinde dahi alacağım olan altı bin guruş ki cem‘an yedi bin yedi yüz elli guruşu tarafımdan bi’l-vekâle merkūmândan ahz u kabz etmekle meblağ-ı mecmû‘-ı mezkûr yedi bin yedi yüz elli guruşu ve yine târih-i mezkûrda yedimde rıkka-i münkāde mâlım olan tahmînen on beş yaşında Çerkesiyyetü’l-asl bir re’s bikr câriyemi dahi bir takrîb fuzûlî ahz ve âhara bey‘ ve teslîmle istihlâk etmekle kıymeti olan sekiz bin guruş ki min-haysü’l-mecmû‘ on beş bin yedi yüz elli guruş târih-i merkūmdan berü yirmi sekiz sene müddet mûmâ-ileyh İsmail Ağa ile bir beldede sâkinler olup benim için bu müddetde huzûr-ı hâkimde da‘vâ mümkün iken mer‘iyü’l-hâtır olmak takrîbiyle da‘vâ etmeyip bilâ-özr sükût ve terk-i da‘vâ etmiş idim el-hâletü hâzihî meblağ-ı bâkī-i merkūm on iki bin yedi yüz elli guruşu mûmâ-ileyh İsmail Ağa’dan taleb ederim deyü inkâra mukārin tasaddî eylediği da‘vâsı takrîr-i meşrûhu üzere yirmi sekiz sene müddetden ber-vech-i meşrûh üzere da‘vâ mümkün iken da‘vâ etmeyip bilâ-özr sükût ve terk-i da‘vâ eylediğini mu‘terif iken on beş sene bilâ-özr terk olunan bu makūle da‘vâ bilâ-emr-i âlî mesmû‘a olmamağla iltifâta şâyân olmadığından mâ‘adâ müdde‘î-i mezbûr Trabzonlu Hasan husûs-ı mezkûru bi-aynihî iki def‘a da‘vâ edip her birinde mürûr-ı zaman ile cevâb verildiğini nâtık işbu sene-i mübâreke şehr-i Rebî‘ülâhirinin on ikinci günü ve Cumâdelâhiresinin yirmi beşinci günü târihleriyle müverrah mûmâ-ileyh İsmail Ağa’nın yedinde olup ibrâz eylediği hâlâ Reisü’l-etibbâ-i hazret-i cihân-dârî ve Sadr-ı vâlâ-yı Rumeli devletlü fazîletlü Abdülhak Efendi hazretlerinin hâtemlerini hâvî mürâfa‘adan verdikleri iki kıt‘a i‘lâm-ı şer‘înin mazmûnunu dahi müdde‘î-i mezbûr Trabzonlu Hasan ikrâr dahi etmeğin mûcebiyle müdde‘î-i mezbûr Trabzonlu Hasan bilâ-emr-i âlî da‘vâ-yı mezkûresiyle mûmâ-ileyh İsmail Ağa’ya mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 7 Ş sene [1]258