İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 484 Hüküm no: 418 Orijinal metin no: [165-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun ile İbrahim Ağa’nın alacak verecek davasında sulh olup zimmet ibrası yaptıkları Ma‘rûz İstanbul’da Müftî Ali mahallesi ahâlisinden iken bundan akdem Mekke-i Mükerreme -alâ-fâtihihâ efdalü’s-salavâti ve ekmelü’t-tahiyye-ye gidip ol belde-i tayyibe-i mübârekede mücâveretle hâlâ sâkine olan derûn-ı arzuhâlde mezkûretü’l-ism Hacce Zeyneb Hatun bt. İsmail b. Abdullah’ın li-ebeveyn er karındaşı ve tarafından husûs-ı âti’l-beyânda vekîl olduğu zâtını ârifân Berber el-Hâc İsmail Ağa b. el-Hâc Mehmed ve Sarrâc el-Hâc Mehmed Ağa b. Mehmed nâm kimesneler şehâdetleriyle ber-nehc-i şer‘î sâbit olan sâhib-i arzuhâl Berber el-Hâc Mehmed Ağa meclis-i şer‘-i münîrde hâlâ Emîn-i Çavuşân-ı Dîvân-ı de‘âvî derûn-ı arzuhâlde mezkûrü’l-ism el-Hâc İbrahim Ağa b. Ali tarafından husûs-ı câi’l-beyânda vekîl-i müseccel-i şer‘îsi sâlifü’l-beyân çavuşândan Halil Ağa b. el-Hâc Mehmed muvâcehesinde kız karındaşım ve müvekkilem mezbûre Hacce Zeyneb Hatun bin iki yüz elli altı senesi şehr-i Rebî‘ülevveli hilâlinde Mekke-i Mükerreme-i mezkûreye gider oldukda İstanbul Duhân Gümrüğü Mukāta‘ası eshâmından bâ-berât-ı âlî-şân mutasarrıfe olduğu ma‘lûmü’l-mikdâr sehmin senevî iki yüz elli guruş fâizini ber-vech-i taksît vaktiyle mahâllinden ahz u kabza ve bâ-temessük-i mütevellî bi’l-icâreteyn mutasarrıfe olduğu mahalle-i mezkûrede kâin ma‘lûmü’l-hudûd bir bâb vakıf menzili dahi beher şehr kırkar guruşa âhara îcâr ve teslîme ve icâre-i mezkûresini müstecirinden ve Hamidiye Vakf-ı şerîfi’nden almak üzere bâ-sened mutasarrıfe olduğu şehriye otuz guruş du‘â-gûy vazîfesini dahi mahâllinden mâh be-mâh ahz u kabza ve bi’l-cümle makbûzunu kendine irsâl ve îsâle müvekkil-i mûmâ-ileyh el-Hâc İbrahim Ağa’yı tarafından tevkîl ve berât ve sened-i mezkûrlar ile tatbîk mührünü dahi îdâ‘ ve teslîm ol dahi ba‘de’l-kabûl müvekkilem mezbûre gittikden sonra vekîl-i mûmâ-ileyh el-Hâc İbrahim Ağa’nın sehm-i merkūm fâizinden işbu sene-i mübârekede duhûl eden Haziran ibtidâsına değin bi’l-vekâle müvekkilem mezbûre için makbûzu olan altı yüz yirmi beş guruş ve menzil-i mezkûru sâlifü’l-beyân bin iki yüz elli altı senesi Cemâziyelevvel’isi gurresinden beher şehr meblağ-ı mezkûr kırk guruşa âhara îcâr ve teslîm etmekle icâre-i mezkûreden yirmi iki ayda bi’l-vekâle makbûzu olan sekiz yüz seksen guruş ve vazîfe-i mezkûreden olarak sene-i merkūme şehr-i Rebî‘ülevveli gurresinden yirmi sekiz ayda bi’l-vekâle makbûzu olan sekiz yüz kırk guruş ki cem‘an iki bin üç yüz kırk beş [guruş] ber-vech-i muharrer makbûzu olup müvekkil-i mûmâ-ileyhin dahi bi-şarti’r-rücû‘ müvekkilem mezbûrenin emriyle mâlından zikr olunan sehmin fâizlerini almak için sûret-i harçlarına masrûfu olan on beş guruş ve mâlından mukaddemâ müvekkilem mezbûreye karz verdiği yüz elli beş guruş ki cem‘an müvekkilem mezbûre zimmetinde yüz yetmiş guruş alacak hakkı olup bâlâda muharrer bi’l-vekâle makbûzu olan meblağ-ı mecmû‘-ı merkūm iki bin üç yüz kırk beş guruşun yüz yetmiş guruşunu müvekkilem mezbûre Hacce Zeyneb Hatun’un deyni olan ber-vech-i meşrûh cem‘an yüz yetmiş guruşa bi’l-vekâle takas ve mahsûb etmemle bâkī kalan iki bin yüz yetmiş beş guruşu dahi berât ve sened ve mühr-i mezkûrlar ile mâ‘an müvekkil-i mûmâ-ileyh el-Hâc İbrahim Ağa vekîl-i mezbûr Halil Ağa yediyle işbu meclis-i şer‘de bana def‘ ü teslîm ben dahi bi’l-vekâle ahz u kabz etmemle bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben müvekkil-i mûmâ-ileyh el-Hâc İbrahim Ağa’nın zimmetini ibrâ-i âmm-ı sahîh-i şer‘î ile kız karındaşım ve müvekkilem mezbûre Hacce Zeyneb Hatun’a izâfetle bi’l-vekâle ibrâ ve iskāt eylediğimde vekîl-i mezbûr Halil Ağa dahi ibrâ-i mezkûrumu bi’l-vekâle kabûl edip bu vechile külliyen kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 12 Ş sene [1]258