İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 485 Hüküm no: 419 Orijinal metin no: [165-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şemseddin Efendi’ye borcu olan Fenerli Yorgi’nin borcunu ödemesi [Ma‘rûz] Tüccârdan sâhib-i arzuhâl el-Hâc Mehmed Şemseddin Efendi b. es-Seyyid Feyzullah İstanbul Mahkemesi’nde meclis-i şer‘-i münîrde mağazacı tâifesinden derûn-ı arzuhâlde mastûrü’l-ism Fenerli Yorgi v. Nikola zimmî muvâcehesinde mersûm Yorgi zimmî zimmetinde işbu târih-i i‘lâmdan altı ay mukaddem <> mahmiye-i İstanbul hısnı ebvâbından Balat kapısı dâhilinde Mahkemealtı nâm mahâlde vâki‘ bir bâb mağazasını istîcâr eylediği esnâda mâlımdan ve yedimden iştirâ ve kabz eylediği ma‘lûmü’l-vezn ve’l-fiyât bakkāl emti‘ası ve çekirdek kahve ve envâ‘-ı şeker ve erzâk-ı mütenevvi‘a-i sâire-i ma‘lûme semenlerinden yirmi dört bin üç yüz on guruş ve târih-i i‘lâm-ı merkūmdan bir sene mukaddem medîne-i hazret-i Ebâ-Eyyûbe’l-Ensârî civârında Defterdâr İskelesi nâm mahâlde vâki‘ diğer bir bâb mağazayı istîcâr eylediği esnâda yine mâlımdan ve yedimden iştirâ ve kabz eylediği vezn ve fiyâtı beynimizde ma‘lûm bakkāl emti‘ası ve çekirdek kahve ve envâ‘-ı şeker ve erzâk-ı mütenevvi‘a-i sâire-i ma‘lûme semenlerinden dahi on üç bin yedi yüz kırk guruş ki cem‘an otuz sekiz bin elli guruş alacak hakkım olup on bir bin altı yüz seksen iki buçuk guruşunu ceste ceste nakden ve dokuz bin beş yüz yedi buçuk guruşunu ol-mikdâr meblağa zikr olunan Mahkemealtı’nda mütemekkin olduğu mağazada mevcûd mâlı olup mukaddemâ iştirâ ve kabz eylediğim bâ-defter-i müfredât <> erzâk-ı mütenevvi‘a-i ma‘lûme semenlerinden ve üç bin üç yüz beş guruşunu dahi ol-mikdâr meblağa mârrü’z-zikr Defterdâr İskelesi’nde vâki‘ mütemekkin olduğu mağazada mevcûd mâlı olup bu def‘a iştirâ ve kabz eylediğim bâ-defter-i müfredât kezâlik erzâk-ı mütenevvi‘a-i ma‘lûme semenlerinden istifâ etmemle bâkīsi olan on üç bin beş yüz elli beş guruşu mersûm Yorgi zimmîden hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olup el-yevm ol-mikdâr guruş müdde‘î-i merkūma zimmetinde bâkī deyni olduğunu tâyi‘an ve kat‘iyyen ikrâr u i‘tirâf etmeğin mûcebince meblağ-ı bâkī-i mezkûr on üç bin beş yüz elli beş guruşun müdde‘î-i mezbûr el-Hâc Mehmed Şemseddin Efendi’ye edâsıyla mersûm Yorgi zimmî ilzâm olunduğu huzûr-ı [âlîlerine i‘lâm olundu] Fî 19 Ş sene 1258 Mecmû‘u tashîh-şüd