İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 487 Hüküm no: 421 Orijinal metin no: [166-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İranlı tacir İsmail Ağa’nın kendisine ait şalları başkasına rehin veren Mısır tüccarından Mehmed Said ve Yağlıkçı Mehmed Ağa’nın şalları iade etmeleri Şâl hükmü [Ma‘rûz] İran tüccârından İsmail Ağa b. Mehmed Bâb-ı âlîlerine takdîm eylediği arzuhâline sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî şallara vâzı‘ıyyü’l-yed olan Mısır tüccârından el-Hâc Mehmed Said Ağa b. Ali ve Yağlıkcı Mehmed Ağa b. el-Hâc Mehmed Salih muvâcehelerinde arzuhâl-i mezkûr derûnunda mezkûretü’l-ism mu‘arrefetü’z-zât Hacce Fatıma Hatun bt. Mahmud hâzıra olduğu hâlde işbu meclis-i şer‘de mu‘âyene ve müşâhede olunup merkūmândan mezbûr el-Hâc Mehmed Said Ağa yedinde olan iki aded sarılı ve beyazlı Acem şalı ve mezbûr Mehmed Ağa yedinde olan üç aded siyâh çiçekli ve marpiç ve buhur Acem şalı benim mâlım ve mülküm iken hâzıra-i mezbûre Hacce Fatıma Hatun işbu sene-i mübâreke Cemâziyelevvel’isinin yirminci günü bi-gayrı hakkın fuzûlî ahz ve iznimsiz zikr olunan iki aded şalı sene-i merkūme Cumâdelâhiresi gurresinde mezbûr el-Hâc Mehmed Said Ağa’ya cihet-i karzdan üç yüz altmış beş guruş deyni mukābelesinde ve mârrü’z-zikr üç aded şalı dahi şehri mezkûrun onuncu günü mezbûr Mehmed Ağa’ya yine cihet-i karzdan iki yüz doksan guruş deyni mukābelesinde rehin vaz‘ ve mezbûrâna teslîm onlar dahi irtihân ve kabz etmeleriyle vaz‘-ı yed ederler lâkin ben rehni mücîzler olmamamla suâl olunup zikr olunan şalları bana teslîme mezbûrân el-Hâc Mehmed Said Ağa ve Mehmed Ağa’ya tenbîh olunmak matlûbumdur deyü da‘vâ ettikde onlar dahi cevâblarında zikr olunan şalları hâzıra-i mezbûre Hacce Fatıma Hatun mâlı olmak üzere târih-i mezkûrlarda deyn-i merkūmları mukābelelerinde rehin vaz‘ ve bize teslîm etmiş idi deyip müdde‘î-i mezbûrun ber-vech-i muharrer müdde‘âsını hâzıra-i mezbûre ile mâ‘an inkâr etmeleriyle müdde‘î-i mezbûr İsmail Ağa ber-vech-i muharrer müdde‘âsını her biri mahâllinden lede’t-tezkiye adl ve makbûlü’ş-şehâde idikleri ihbâr olunan İstanbul’da Yıldız Hanı’nda sâkin tüccârdan Abdülkerim Ağa b. el-Hâc Rıza ve Vâlide Hanı’nda sâkin yine tüccârdan Mehmed Ağa b. Ali nâm kimesneler şehâdetleriyle huzûr-ı hazret-i müşârün-ileyhde bi’l-muvâcehe ber-nehc-i şer‘î isbât etmeğin mûcebince zikr olunan şalları müdde‘î-i mezbûr İsmail Ağa’ya def‘ ü teslîme mezbûrân el-Hâc Mehmed Said Ağa ve Mehmed Ağa’ya tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 2 Ş sene 1258