Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 475 Hüküm no: 564 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe b. Hasan’ın mukátaalı vakıf menzilini Şerife Ümmühâni bt. Seyyid Abdullah’a satması Husûs-ı âti’l-beyânın mahallinde tahrîri iltimâs olunmağın savb-ı şer‘[den] irsâl olunan Mevlânâ Abdullah Efendi b. el-Hâc Veli ol dahi mahmiye-i İstanbul’da Âbid Çelebi mahallesinde sâkin Ali Ağa b. Oruc’un menziline varıp zeyl-i vesîkada muharrerü’l-esâmî olan müslimîn huzûrunda akd-i meclis-i nebevî eyledikde mahalle-i mezbûrda camcı İbrahim Beşe b. Hasan nâm kimesne meclis-i münîr-i mezbûrda, bâ‘isü hâze’l-vesîka Ümmühâni bt. es-Seyyid Abdullah Efendi nâm hâtun tarafından husûs-ı âti’l-beyâna [vekîl] olup zâtını ma‘rifet-i şer‘iyye ile ârifân el-Hâc Abdurrahman b. Musa ve el-Hâc Ahmed b. Cuma nâm kimesneler şehâdetleri ile şer‘an vekâleti sâbite olan vâlidesi Fâtıma bt. Süleyman mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezbûrede vâki‘ bir tarafdan Mi‘mâr Kasım Ağa odaları ve bir tarafdan Süley[man] Efendi bahçesi ve bir tarafdan Abdüssamed Efendi bahçesi ve bir tarafdan ba‘zan Abdullah Efendi tasarrufunda olan vakıf menzil ve ba‘zan imâm Mehmed Efendi tasarrufunda olan vakıf menzil ve ba‘zan tarîk-i hâs ile mahdûd menzilin dâhiliyyesinin mecmû‘-ı arsası merhûm Âbid Çelebi vakfına senede otuz akçe mukāta‘a ve binâ zirâ‘ıyla bi hesâb-ı terbî‘î iki yüz otuz zirâ‘ ve üzerinde mülküm olan fevkānî bir kebîr oda ve sofa ve tahtında bir oda ve kenîfi sekiz yüz esedî guruşa bey‘ ve teslîm ve hâriciyyesinin kezâlik bi hesâb-ı terbî‘î binâ zirâ‘ıyla mecmû‘-ı arsası iki yüz elli dokuz zirâ‘a ve arsa üzerinde ebniyesi olan bir bâb fevkānî oda ve dâhiliyyesi iki bâb fevkānî kebîr oda ve bir sagīr ve tahtânî iki oda ve bir hamam ve bir matbah ve bir yer odası ve merdiven başında bir camlı oda ve iki kenîf ve su kuyusu ve bir bahçeyi müştemil hâriciyyesinin ebniye ve arsası bi izn-i mütevellî üç yüz esedî guruşa vekîl-i mezbûr yedinden tamâmen ahz u kabz ve istîfâ eyledim ba‘de’l-yevm işbu menzil-i mezbûrun ebniye-i memlûkesi müvekkil-i merkūm Şerife Ümmühâni Hâtun’un mülk-i müşterâsı olup ve arsaları hakk-ı müfevvezi olmuşdur. Bir vechile menzil-i mezbûrun ebniye ve arsalarında alâka ve medhalim kalmamışdır keyfe mâ yeşâ ve yahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr ve ba‘dehû ma‘an irsâl olunan Receb Çelebi b. Şaban ve Mahmud b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ali Ağa b. Oruc, el-Hâc Yusuf b. Murad, Hüseyin Çelebi b. Cafer, Osman Beşe b. İbrahim, Abdullah Efendi Sahhâf, Mustafa Çelebi b. İsmail.