İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 494 Hüküm no: 427 Orijinal metin no: [168-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mağazacı Muamelecioğlu Yorgaki’ye borcunu ödemesi için İranlı tacir Esedullah Ağa’ya yapılan tenbih 18150 [guru]ş ahz u kabz [Ma‘rûz] Mağazacı tâifesinden olup arzuhâl eden Muâmelecioğlu Yorgaki v. Yani zimmî Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde İran tüccârından derûn-ı arzuhâlde ismi mezkûr Esedullah Ağa b. el-Hâc Ali muvâcehesinde taraf-ı sefâretden Abdullah Ağa hâzır olduğu hâlde mezbûr Esedullah Ağa zimmetinde sene-i sâbıkā Zilka‘detü’ş-şerîfesi gurresinde İstanbul’da Vâlide Hanı’nda tüccârdan Manoloğlu Vasil nâm zimmî odasında beher topu yetmiş üçer guruşa olmak üzere mâlımdan ve yedimden iştirâ ve kabz eylediği iki denk olarak iki yüz kırk dokuz top Acem cibini semeninden on sekiz bin yüz yetmiş yedi guruş alacak hakkım olup yirmi yedi guruşunu ber-vech-i peşîn bana edâ etmekle mâ‘adâ on sekiz bin yüz elli guruş zimmetinde bâkī kalıp hattâ mezbûr Esedullah Ağa meblağ-ı mezkûr on sekiz bin yüz elli guruş cihet-i mezkûreden bâkī zimmetinde bana deyni olduğunu târih-i merkūmdan iki taksîtle yüz yirmi iki gün tamamına değin bana edâya ta‘ahhüd ederek ikrâr ve ber-vech-i muharrer ikrârını müştemil ve târih-i mezkûr ile müverrah ve kendi mührüyle memhûr yedime bir kıt‘a deyn tahvîli dahi i‘tâ ettikden sonra târih-i merkūmdan berü bana bir akçe ve bir habbe vermemekle meblağ-ı bâkī-i merkūm on sekiz bin yüz elli guruşu mezbûr Esedullah Ağa’dan hâlâ taleb ederim deyü mazmûnu takrîrine mutâbık tahvîl-i mezkûru ibrâz ile da‘vâ ettikde ol dahi cevâbında külliyen inkâr etmekle müdde‘î-i mersûm Yorgaki zimmî ber-vech-i muharrer müdde‘âsını her biri mahallerinden lede’t-tezkiye adl ve makbûlü’ş-şehâde idikleri ihbâr olunan İstanbul’da Hocapaşa mahallesi ahâlisinden olup Eminönü nâm mahâlde mağazacı olan es-Seyyid Ali Yazıcı b. Mehmed ve Çenberlitaş civârında Üçler mahallesi ahâlisinden olup Ayasofya-i Kebîr Câmi‘-i şerîfi civârında kurâbiyeci olan İspartalı es-Seyyid Mehmed Ağa b. Osman nâm kimesneler şehâdetleriyle huzûr-ı hazret-i müşârün-ileyhde bi’l-muvâcehe vech-i vecîh-i şer‘î üzere isbât etmeğin mûcebince meblağ-ı bâkī-i mezkûr on sekiz bin yüz elli guruşu müdde‘î-i mesfûr Yorgaki zimmîye edâ ve teslîme mezbûr Esedullah Ağa’ya tenbîh olunduğu İstanbul [169] Mahkemesi’nden huzûr-ı âlîlerine i‘lâm olundu. Fî 23 Ş sene 1258