İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 495 Hüküm no: 428 Orijinal metin no: [169-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Haralambo ve kardeşi Kostandi vârislerinin alacak davasıyla Yani ve Yorgi zimmîlere açtıkları alacak davasında birbirlerinin zimmetlerini ibra ettikleri Ma‘rûz Vilâyet-i Anadolu’da Trabzon sancağına [muzâfe] Maçka Kazâsı’na tâbi‘ Kalyara karyesinde mütemekkin iken bundan akdem hâlik olan Haralambo v. Vasil zimmînin verâseti hâlâ karye-i mezkûrede mütemekkinler zevce-i metrûkesi Palaşa bt. Nikola Nasrâniye ile sulbî kebîr oğulları Gorgor ve Yorgi zimmîler ve kebîre kızları Sofya ve Palaiye Nasrâniyelere münhasıra ba‘dehû hâlik-i mersûmun li-ebeveyn er karındaşı Kostandi zimmî dahi karye-i mezkûrede mütemekkin iken hâlik olup verâseti kezâlik karye-i mezkûrede mütemekkinler zevce-i metrûkesi Kadinko bt. Yorgi Nasrâniye ile sulbî kebîr oğlu Vasil zimmî ve kebîre kızları diğer Palaiye ve Anasta Nasrâniyelere ba‘de’l-inhisâr karye-i mezkûre re‘âyâsından poliçeci tâifesinden derûn-ı arzuhâlde ismi mastûr Gürcüoğlu Lazari v. Mosi zimmî bi’t-terâzî bâb-ı cenâb-ı Fetvâ-penâhî’de İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i hatîrde hâlik-i mersûmânın li-ebeveyn er karındaşları olup <> nefsinden asıl ve verese-i gāibûn mersûmûn Palaşa Nasrâniye ve Gorgor ve Yorgi zimmîler ve Sofya ve Palaiye ve Kadinko Nasrâniyeler ve Vasil zimmî ve diğer Palaiye ve Anasta Nasrâniyeler taraflarından husûs-ı âti’l-beyânda vekîl-i şer‘îleri arzuhâl sâhiblerinden ve kazancı esnâfından Yani zimmî ile kazâ-i mezkûra muzâfe Lora karyesi re‘âyâsından ve esnâf-ı mezkûreden Yorgi v. Sava zimmî muvâcehelerinde asıl ve vekîl-i mersûm Yani zimmî ile karındaşları hâlikân-ı mersûmân Haralambo ve Kostandi zimmîler sağlıklarında zikr olunan Kalyan [Kalyara] karyesinde mâlımdan ve yedimden mâ‘an karz aldıkları on üç bin guruş zimmetlerinde alacak hakkım olmağla meblağ-ı mezkûrun sülüsânı olup mersûmân Haralambo ve Kostandi zimmîlerden iktizâ eden sekiz bin altı yüz altmış altı buçuk guruş yirmi akçeyi bana kable’l-edâ mersûmân Haralambo ve Kostandi zimmîler hâlik olmalarıyla meblağ-ı merkūm sekiz bin altı yüz altmış altı buçuk guruş yirmi akçeyi vârisleri müvekkilûn-ı gāibûn-ı mersûmûn vâzı‘ü’l-yed oldukları mûrisleri hâlikân-ı mersûmânın tereke-i vâfiyelerinden ve meblağ-ı mezkûr on üç bin guruşun sülüsü olup mersûm Yani zimmîden iktizâ eden dört bin üç yüz otuz üç guruş kırk akçeyi dahi mersûm Yani zimmî kendi mâlından ve mersûm Yorgi zimmî dahi zikr olunan Lora karyesinde mâlımdan ve yedimden iktirâz ve kabz edip zimmetinde alacak hakkım olan yedi bin guruşu dahi mesfûr Yorgi zimmî bundan akdem bana tamamen edâ ve teslîm, ben dahi yedlerinden bi’t-tamam ahz u kabz edip gerek hâlikân mersûmân zimmetlerinde ve gerek asıl ve vekîl-i mersûmân Yani ve Yorgi zimmîler zimmetlerinde aslâ ve kat‘a hakkım ve alacağım kalmamağla bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben asıl ve vekîl-i mersûmân Yani ve Yorgi zimmîler ile müvekkilûn-ı gāibûn-ı mesfûrûnun zimmetlerini kabûle mukārin ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı münâza‘a eyledik deyü ikrâr <> ve tasâdıkları tescîl ve İstanbul Mahkemesi’nden huzûr-ı <<âlîlerine>>[âlîlerine i‘lâm olundu] Fî 28 Ş sene [12]58