İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 496 Hüküm no: 429 Orijinal metin no: [169-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oduncu Mehmed Ağa’ya borcu olan Hamamcı Hüseyin’in borcunu ödemesi 2545 [guru]ş hüküm [Ma‘rûz] Hatab tüccârından derûn-ı arzuhâlde mezkûrü’l-ism el-Hâc Mehmed Ağa b. el-Hâc Ebûbekir meclis-i şer‘-i münîrde İstanbul’da Davudpaşa Hamamı Hamamcısı sâhib-i arzuhâl es-Seyyid Hüseyin Ağa b. Osman muvâcehesinde yedimde olup şehr-i sâbık Recebi’l-müreccebinin yedinci günü târihiyle müverrah ve hâlâ İstanbul Bâb Mahkemesi nâibi müderrisîn-i kirâmdan es-Seyyid Ahmed Efendi’nin hâtemiyle mahtûm bir kıt‘a i‘lâm-ı şer‘î nâtık olduğu üzere mezbûr es-Seyyid Hüseyin Ağa zimmetinde işbu sene-i mübâreke Cumâdelâhiresi gurresinde beher çekisi on ikişer guruşa olmak üzere mâlımdan ve yedimden iştirâ ve kabz eylediği iki yüz yetmiş çeki hatab semeninden üç bin iki yüz kırk beş guruş alacak hakkım olup yedi yüz guruşunu bana edâ etmekle bâkīsi olan iki bin beş yüz kırk beş guruşu mezbûr es-Seyyid Hüseyin Ağa’dan nâib-i mûmâ-ileyh huzûrunda taleb ve da‘vâ eylediğimde ol dahi ber-vech-i muharrer iki yüz yetmiş çeki hatab semeninden bâkī iki bin beş yüz kırk beş guruş zimmetinde bana deyni olduğunu ikrâr lâkin ben sene-i sâbıkā şehri Rebî‘ülevveli evâhirinde beher çekisi on beşer guruş yirmi dörder paraya olarak yedinden sekiz yüz yetmiş çeki hatab iştirâ ve kabz ve hesâbını sahîhan rü’yet edip semeni olan on üç bin beş yüz elli altı guruşu târih-i merkūmda tamamen sana edâ ve teslîm eylediğimden mâ‘adâ mârrü’z-zikr sekiz yüz yetmiş çeki hatab husûsunda her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt dahi etmişidik ise de sen sene-i sâbıkā-i mezkûrede hatabın beher çekisini âhara on birer guruşa bey‘ eylediğinden sâlifü’z-zikr sekiz yüz yetmiş çeki hatab semeni dahi ber-minvâl-i muharrer on birer guruşdan dokuz bin beş yüz yetmiş dört guruş olup bu sûretde benden üç bin dokuz yüz seksen iki guruş ziyâde almış olmanla öyle olucak ber-vech-i meşrûh ziyâde medfû‘um olan üç bin dokuz yüz seksen iki guruşdan hâlâ deynim olan meblağ-ı bâkī-i merkūm iki bin beş yüz kırk beş guruş takasan tenzîl olunup bâkīsi olan bin dört yüz otuz yedi guruşu senden istirdâd ederim deyü benden tasaddî eylediği da‘vâsı takrîr-i meşrûhu üzere meşrû‘a ve iltifâta şâyân olmadığı kendine tefhîm ve mûcebince da‘vâ-yı mezkûresiyle bana bî-vech-i şer‘î mu‘ârazadan ve meblağ-ı bâkī-i mezkûr iki bin beş yüz kırk beş guruş mezbûr es-Seyyid Hüseyin Ağa üzerine ikrârıyla hüküm olunmuş iken hâlâ edâ etmemekle meblağ-ı mahkûmün-bih-i merkūm iki bin beş yüz kırk beş guruşu mezbûr es-Seyyid Hüseyin Ağa’dan hâlâ taleb ederim deyü mazmûnu takrîrine mutâbık i‘lâm-ı mezkûru ibrâz ile da‘vâ ettikde ol dahi cevâbında mazmûn-ı i‘lâm-ı mezkûru bi-tamamihi tâyi‘an ve kat‘iyyen ikrâr ü i‘tirâf edip lâkin yine minvâl-i [muharrer] üzere da‘vâ-yı istirdâda tasaddî etmiş ise de meşrû‘a olmadığından kemâ-fi’s-sâbık da‘vâ-yı mezkûresine iltifât olunmayıp mûcebiyle meblağ-ı mahkûmün-bih-i merkūm iki bin beş yüz kırk beş guruş mezbûr es-Seyyid Hüseyin Ağa’dan tahsîl ve müdde‘î-i mezbûr el-Hâc Mehmed Ağa’ya teslîm ettirilmek iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 22 Ş sene 1258