İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 497 Hüküm no: 430 Orijinal metin no: [169-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın kendisine ait oturakçı dükkân gediğini zapt ettiği iddiasıyla Koltukçu İbrahim Edhem Ağa’ya açtığı davada haksız bulunduğu Oturakcı gediği nizâ‘ı [Ma‘rûz] Sâhib-i arzuhâl es-Seyyid Ahmed Ağa b. el-müteveffâ Oturakcı es-Seyyid Abdullah Ağa bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî bir bâb vakıf dükkâna bâ-temessük-i mütevellî mutasarrıf ve vâzı‘ü’l-yed olan derûn-ı arzuhâlde mezkûrü’l-ism Koltukçu es-Seyyid İbrahim Edhem Ağa b. İbrahim muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan Kādı-i Rum Molla Hüsrev merhûm Vakfı müsakkafâtından İstanbul’da Batpazarı kapısı nezdinde Covanni? dükkânı ittisâlinde kâin [170] bir bâb vakıf oturakcı dükkânı Rabia Hanım bt. el-merhûm Ser-etibbâ-i hâssa esbak el-Hâc Mehmed Emin Efendi’nin bâ-temessük-i mütevellî bi’l-icâreteyn taht-ı tasarrufunda ve babam müteveffâ-yı mezbûr es-Seyyid Abdullah Ağa dahi hayatında dükkân-ı mezkûrda şehriye kırkar para kirâ ile müşâhereten müsteciri iken dükkân-ı mezkûrun mutasarrıfesi mûmâ-ileyhâ bin iki yüz on altı senesi hilâlinde dükkân-ı mezkûra rağbet verip gedik edip babam mezbûr yedine bir kıt‘a memhûr gedik tezkiresi verdikden sonra zikr olunan tezkire babam mezbûr yedinden bir takrîb zâyi‘ olmağla mûmâ-ileyhâ Rabia Hanım bin iki yüz otuz senesi Muharremi’l-harâmı gurresi târihiyle müverraha tekraren işbu bir kıt‘a memhûr gedik tezkiresini babam mezbûr yedine verdikden sonra mûmâ-ileyhâ Rabia Hanım ve babam mezbûr es-Seyyid Abdullah Ağa’dan her biri vefât edip dükkân-ı mezkûr müteveffât-ı mûmâ-ileyhânın sadriye kebîre kerîmesi Hatice Hanım’a hasbe’l-âde intikāl ettikde ol dahi dükkân-ı mezkûru şehri sâbık Recebi’l-mürecceb’in on birinci günü mezbûr es-Seyyid ibrahim Edhem Ağa’ya bâ-re’y-i mütevellî ferâğ ve tefvîz ol dahi tefevvüz ve kabûl ettikden sonra aklâm-ı Pâdişâhînin birinde mukayyed olarak gediği olmayıp ve gedik için zikri âtî evkāf-ı celîle cânibinden bir kimesneye temessük dahi verilmediğinden mezbûr es-Seyyid İbrahim Edhem Ağa dükkân-ı mezkûra vaz‘ ve derûnunda oturakcılık icrâ etmek üzere Hudâvendigâr-ı sâbık müstağrak-ı bihâr-ı rahmet-i Hâlık vâlid-i kesîrü’l-mehâmid-i hazret-i Hilâfet-penâhî mazhar-ı gufrân-ı İlâhî hazret-i Sultan Gāzi Mahmud Han -aleyhi eltâfü Rabbihi’l-Mennân- evkāf-ı celîleleri müstegallâtından oturakcı gediği iki yüz guruş icâre-i mu‘accele ve şehriye on beş akçe icâre-i müeccele ile şehr-i mezkûrun yirmi sekizinci günü taraf-ı evkāf-ı celîleden mezbûr es-Seyyid İbrahim Edhem Ağa’ya îcâr ve teslîm ve mu‘accele-i mezkûre Hazîne-i Evkāf-ı celîle tarafından tamamen kabz olunup mezbûr es-Seyyid İbrahim Edhem Ağa dahi istîcâr ve tesellüm ve kabûl ve yedine târih-i merkūm ile müverrah bir kıt‘a mütevellî temessüğü i‘tâ olunup ol-vechile dükkân ve gedik-i mezkûrlar el-yevm tasarrufunda olmağla vaz‘-ı yed eder lâkin mukaddemâ mülküne mutasarrıfe olan mûmâ-ileyhâ Rabia Hanım mücerred ber-vech-i muharrer dükkân-ı mezkûra rağbet verip gedik edip babam müteveffâ-yı mezbûr yedine gedik tezkiresi verip ve ba‘de’l-vefât hasran vârisi olduğumdan bana mevrûs dahi olmuş olmağla binâen-aleyh dükkân-ı mezkûru tahliye ve bana teslîm birle gedik-i mezkûresini mâh be-mâh yedinden ahza mezbûr es-Seyyid İbrahim Edhem Ağa’ya tenbîh olunmak murâdımdır deyü da‘vâ ettikde gedik nizâmının i‘tibârî bir husûsun devam ve istikrârı zımnında taraf-ı Pâdişâhîden i‘tâ olunup aklâmdan birinde mukayyed veyâhûd cânib-i evkāf-ı celîleden usûlü üzere verilen senedât-ı mu‘tebereye sebti olur ise kānûnen mu‘teberândan olup mülk ashâbı icâreteyn ile müstecir olanların gedik i‘tibâr edip tezkire vermelerine şer‘an ve kānûnen i‘tibâr olunmadığından tasaddî eylediği da‘vâsı şer‘an ve kānûnen mesmû‘a ve mu‘tebere olmadığı müdde‘î-i mezbûr es-Seyyid Ahmed Ağa’ya tefhîm ve mûcebince da‘vâ-yı mezkûresiyle mezbûr es-Seyyid İbrahim Edhem Ağa’ya bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 23 Ş sene 1258