İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 499 Hüküm no: 431 Orijinal metin no: [170-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb Mehmed Yaşa Ağa’nın ortaklığını feshettiği Kasap Kosti’ye açtığı alacak davasında sulh olduğu 20000 [guru]şa sulh [Ma‘rûz] Celeb tâifesinden sâhib-i arzuhâl Beylikci Mehmed Yaşar Ağa b. Hüseyin meclis-i şer‘-i münîrde mukaddemâ şerîki derûn-ı arzuhâlde mastûrü’l-ism Kasab Kosti v. Tanaş zimmî muvâcehesinde ben mersûm Kosti zimmî ile bin iki yüz elli altı [senesi] şehr-i Rebî‘ülâhirinin yirmi birinci gününden işbu sene-i mübâreke şehr-i Rebî‘ülâhirinin yirmi üçüncü gününe gelince kasablık ticâretinde inânen şerîkler olup ba‘dehû târih-i merkūmda fesh-i akd-i şirket birle hesâbını sehv ü galatdan ârî sahîhan rü’yet eylediğimizde lede’l-muhâsebe benim gerek re’s-i mâl ve gerek fâideden hissem olup mersûm Kosti zimmî zimmetinde kābız-ı mâl olduğundan on sekiz bin beş yüz guruş alacağım zuhûr ettikde mersûm Kosti zimmî meblağ-ı merkūm on sekiz bin beş yüz guruş cihet-i mezkûreden zimmetinde bana deyni olduğunu ikrâr-ı kat‘î ile ikrâr dahi etmekle meblağ-ı mezkûr on sekiz bin beş yüz guruş ve mâlımdan ve yedimden iktirâz ve kabz edip bâ-i‘lâm-ı şer‘î mahkûmün-bih olan bin beş yüz guruş ve Yedikule kasab ustalarından işbu hâzır bi’l-meclis Mercanlı Mehmed Ağa b. el-Hâc Osman’a mersûm Kosti zimmînin deyni olup bi-şarti’r-rücû‘ emriyle bi-hükmi’l-kefâle mâlımdan edâ eylediğim altı bin beş yüz guruş ki cem‘an zimmetinde alacak hakkım olan yirmi altı bin beş yüz guruşu mesfûr kosti zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm ile kat‘a li’n-nizâ‘ yirmi bin guruş üzerine bi’t-terâzî ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt eylediğimizden mâ‘adâ ibrâdan müstesnâ bedel-i sulh-ı mezkûr yirmi bin guruşu dahi mesfûr Kosti zimmî târih-i i‘lâmdan altı ay mürûrunda bana tamamen edâ ve teslîme ta‘ahhüd ettikde ben dahi râzı olup bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 26 Ş sene 1258