İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 500 Hüküm no: 432 Orijinal metin no: [170-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Kostandi’nin Tütüncü İlya’ya olan borcunu ödemesi 2500 [guru]ş men‘ [Ma‘rûz] Âsitâne-i aliyye’de vâki‘ tütün kıyıcı tâifesinden olup arzuhâl eden Kuds-i şerîfli İlya v. Corci zimmî meclis-i şer‘-i hatîrde medîne-i İzmir re‘âyâsından olup hâlâ İstanbul Duhân Gümrüğü civârında tütüncü olan derûn-ı arzuhâlde ismi mastûr Kostandi v. Panayot zimmî muvâcehesinde mersûm Kostandi zimmî zimmetinde milâd-ı hazret-i İsa’nın bin sekiz yüz otuz sekiz senesi Kasımının on beşinci günü medîne-i mezkûrede Ebûbekir Paşa Hanı’nda mâlımdan ve yedimden iktirâz ve kabz ve umûruna sarfla istihlâk eylediği iki bin beş yüz guruş alacak hakkım olup hattâ meblağ-ı merkūm iki bin beş yüz guruş cihet-i mezkûreden zimmetinde bana deyni olduğunu ikrar ve ber-vech-i muharrer ikrârını nâtık ve târih-i merkūm ile müverrah bir kıt‘a deyn tahvîlini dahi yedime vermekle meblağ-ı mezkûr iki bin beş yüz guruşu mesfûr Kostandi zimmîden hâlâ taleb ederim deyü da‘vâ ettikde ol dahi cevâbında târih-i merkūmda müdde‘î-i mersûmdan ol-mikdâr guruş ikrâz ve kabz ve istihlâk ve ikrâr-ı deyn edip tahvîl-i mezkûru verdiğini <> bi-tamamihi tâyi‘an ve kat‘iyyen ikrâr ü i‘tirâf edip lâkin ben ol târihde duhân tüccârından medîne-i mezkûrede mütemekkin Mavrioğlu Yanaki nâm zimmînin yanında hizmetkârı olup beni ol-mikdâr meblağ karz alıvermeye ve meblağ-ı merkūmu umûr-ı lâzımesine harc ü sarfa tevkîl etmekle ben dahi mersûma bana iki bin beş yüz guruş ver deyip ol dahi bana ol-mikdâr guruş karz verip ben dahi mersûm Yanaki zimmînin umûr-ı mezkûresine sarf etmemle öyle olucak müdde‘î-i mersûm iki bin beş yüz guruşu gāib-i mersûmdan mutâlebe etsin deyü îrâd eylediği kelâmı istikrâzı müvekkile izâfet etmeyip kendi nefsine izâfet eylediğini mukırr u mu‘terif iken def‘e sâlih cevâb-ı şer‘î olmamağla iltifât olunmayıp mûcebince meblağ-ı mezkûr iki bin beş yüz guruşu müdde‘î-i mersûm İlya zimmîye edâ ve teslîmiyle mersûm Kostandi zimmîye tenbîh olunduğu huzûr-ı [âlîlerine i‘lâm olundu] Fî 27 Ş sene [1]258