İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 501 Hüküm no: 433 Orijinal metin no: [170-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolulu Aşçı İbrahim Ağa’nın muhâlaa yoluyla boşandığı hanımı Nefise Hatun’da kalan eşyalarının kendisine iadesi Eşyâ teslîme ta‘ahhüd [Ma‘rûz] Derûn-ı arzuhâlde mezkûrü’l-ism Bolulu Aşçı İbrahim Ağa b. Halil bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi tarafından mürsel Kâtib Halil Niyazi Efendi [171] hâzır olduğu hâlde meclis-i şer‘-i münîrde hâlâ zevce-i medhûlün-bihâsı ve zikri âtî bir bâb vakıf menzilin nısf hisse-i şâyi‘asına bâ-temessük-i mütevellî mutasarrıfe olan sâhibe-i arzuhâl mu‘arrefetü’z-zât Şerife Nefîse Hatun bt. Ahmed muvâcehesinde gāibetü ani’l-meclis Şerife Hatice Hatun bt. Ahmed bâ-temessük-i mütevellî bi’l-icâreteyn mutasarrıfe olduğu Evkāf-ı Haremeyn-i Muhteremeyn müsakkafâtından İstanbul’da Kumkapı dâhilinde Çadırcı Ahmed Çelebi mahallesinde kâin ma‘lûmü’l-hudûd bir bâb vakıf menzili bin iki yüz elli bir senesi Saferi’l-hayrı’nın birinci günü benimle zevcem mezbûre Şerif Nefîse Hatun’a ale’l-iştirâki’s-seviyy altı bin guruş bedel mukābelesinde bâ-re’y-i mütevellî ferâğ ve tefvîz ettikde bedel-i mezkûrun nısfı olup zevcem mezbûreden iktizâ eden üç bin guruşu emrinsiz mâlından teberu‘an fâriğa-i mezbûre Şerife Hatice Hatun’a def‘ ü teslîm etmemle öyle olucak menzil-i mezkûrun nısf-ı âharı dahi benim olmuş olur binâen-aleyh zevcem mezbûre menzil-i mezkûrun nısf-ı âharından keff-i yed eylesin yâhûd fâriğa-i mezbûreye vech-i muharrer üzere medfû‘um olan meblağ-ı merkūm üç bin guruşu mâlından bana zâmine olsun ve ben diyâr-ı âharda iken Darbhâne-i Âmire tarafından bâ-berât-ı âlî mutasarrıf olduğum şehriye yüz yirmişer guruş ma‘âşımdan altı ayda tarafımdan bi’l-vekâle makbûzu olan yedi yüz yirmi guruş ve medîne-i Üsküdar’da kâin mutasarrıf olduğum bir bâb vakıf menzilin şehriye yirmi beşer guruş kirâsından kezâlik altı ayda bi’l-vekâle makbûzu olan yüz elli guruş ki cem‘an sekiz yüz yetmiş guruşun dört yüz seksen guruşunu emrimle nafaka ve kisvesine harc ü sarf ve bâkī üç yüz doksan guruşunu dahi bana teslîm etmiş ise de lâkin zevcem mezbûrenin iki yüz kırk guruşdan ziyâde sarfına ben sonradan râzı olmayıp ve ber-vech-i muharrer emrime nâdim olduğuma binâen ziyâdesi olan iki yüz kırk guruşu dahi bana zâmine olsun deyü takrîr-i meşrûhu üzere tasaddî eylediği da‘vâları şer‘an mesmû‘a ve iltifâta şâyân olmadığı müdde‘î-i mezbûr İbrahim Ağa’ya tefhîm olunmağla mûcebiyle da‘vâ-yı mezkûreleriyle zevcesi mezbûre Şerife Nefîse Hatun’a bî-vech-i şer‘î mu‘ârazadan ba‘de’l-men‘ mezbûre Şerife Nefîse Hatun meclis-i şer‘de zevci mezbûr İbrahim Ağa muvâcehesinde zevci mezbûr zimmetinde mütekarrir ve ma‘kūdun-aleyh olan beş yüz guruş mehr-i müecceli ile nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere zevci mezbûr ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru <> kabûl eylediğinden mâ‘adâ mâlı olup mezbûre Şerife Nefîse Hatun yedinde kalan bir nühâs mangal ve iki tencere ma‘a kapak ve bir tâbe ve bir ta‘âm tepsisi ve bir şorba tası ve yün memlû bir çit döşek ma‘a baş yastığı ve iki çit yorgan ve bir sagīr penbe memlû şilte ve bir dolab ve iki beyaz tabağı dahi mezbûre Şerife Nefîse Hatun bi-a‘yânihâ zevc-i muhâlı‘-ı mezbûra teslîme ta‘ahhüd eylediği tescîl ve İstanbul Mahkemesi’nden huzûr-ı [âlîlerine i‘lâm olundu] Fî 29 Ş sene 1258