İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 502 Hüküm no: 434 Orijinal metin no: [171-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekke Kadısı Hüseyin Efendi’ye cariye bedellerinden kalan borcunu ödemesi için İzmirli Mehmed Efendi’ye yapılan tenbih 917 [guru]ş hüküm Ma‘rûz Mevâlî-i i‘zâm-ı zevi’l-ihtirâmdan sâbıkā Mekke-i Mükerreme kādısı sâhib-i arzuhâl es-Seyyid el-Hâc Hüseyin Efendi b. el-merhûm Kâtib-i Ağa-yı Dârü’s-sa‘âdeti’ş-şerîfe Ağası esbak el-Hâc Ahmed Efendi meclis-i şer‘-i münîrde derûn-ı arzuhâlde mezkûrü’l-ism İzmirli el-Hâc Mehmed Efendi b. Ahmed muvâcehesinde mezbûr el-Hâc Mehmed Efendi ben Mısr-ı Kāhire Kādısı iken yedime verdiği işbu bir kıt‘a deyn tahvîli mantûkunca bin iki yüz elli dört senesi şehri Rebî‘ülevvelinin yirmi beşinci günü mâlımdan ve yedimden bi-safkatin vâhidetin iştirâ ve kabz eylediği bir re’s zenci gulâm ve yedi re’s zenciye câriye semeninden sekiz bin guruş ve mâlım olup tarafımdan bi’l-vekâle âhara bey‘ ve teslîm eylediği ma‘lûmü’r-re’s câriye semenlerinden kabz ve zimmetine ta‘alluk eylediği gayrı ez mesârifi’l-makbûle üç bin dokuz yüz altmış yedi buçuk ki cem‘an zimmetinde alacak hakkım olan on bir bin dokuz yüz altmış yedi buçuk guruşun beş yüz elli guruşunu mezbûr el-Hâc Mehmed Efendi’nin mâlından ol-mikdâr meblağa iştirâ ve kabz eylediğim bir pirinç mangal ma‘a tahta semeninden ve bin beş yüz guruşunu yine mâlından ol-mikdâr meblağa kable-iftirâki’l-ebdân iştirâ ve kabz eylediğim bir altın çalar koyun sâ‘ati semeninden ve beş yüz guruşunu yine mâlından ol-mikdâr meblağa iştirâ ve kabz eylediğim bir hilâlî rehâvî çalar sâ‘at semeninden bir def‘a altı bin guruş ve bir def‘a dahi bin beş yüz guruş ve bir def‘a dahi bin guruşunu nakden istifâ etmemle bâkīsi olan dokuz yüz on yedi buçuk guruşu mezbûr el-Hâc Mehmed Efendi’den hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin alâ-mûcebi i‘tirâfihâ meblağ-ı bâkī-i merkūm dokuz yüz on yedi buçuk guruşu müdde‘î-i mûmâ-ileyh el-Hâc Hüseyin Efendi’ye edâ ve teslîme mezbûr el-Hâc Mehmed Efendi’ye tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî-gurreti Ş sene 1258