İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 503 Hüküm no: 435 Orijinal metin no: [171-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tunuslu Ali’nin alacak talebiyle Halepli Mehmed ile kardeşi Abdurrahman’a açtığı davada sulh olup zimmet ibrası yaptığı [Ma‘rûz] Sâhib-i arzuhâl Tunuslu es-Seyyid el-Hâc Ali b. es-Seyyid Ahmed şifâhen sâdır olan fermân-ı âlîlerine imtisâlen Salı günü huzûr-ı hazret-i Fetvâ-penâhî’de akd meclis-i şer‘-i münîrde derûn-ı arzuhâlde mezkûrü’l-ism olup nefsinden asıl ve li-ebeveyn er karındaşı Abdurrahman b. el-Hâc Mustafa tarafından husûs-ı âti’l-beyânda [172] vekîl-i müsecceli Halebli el-Hâc Mehmed muvâcehesinde yedimde olup sene-i sâbıkā yani bin iki yüz elli yedi senesi Saferi’l-hayrı gurresi târihiyle müverrah asıl ve vekîl ve müvekkil-i mezbûrân el-Hâc Mehmed ve Abdurrahman’ın yedime verdikleri işbu bir kıt‘a memhûr sened nâtık olduğu üzere mâlımdan bi-tarîki’l-mudârebe kendilere def‘ ü teslîm edip onlar dahi bi’l-ma‘iyye ahz u kabz eyledikleri beş yüz elli guruşu bir müddet i‘mâl edip ba‘dehû hesâbını sahîhan rü’yet eylediğimizde lede’l-muhâsebe benim gerek re’s-i mâl-ı mezkûrum ve gerek şartlarımız üzere fâideden hisseme isâbet eden üç yüz guruş ki cem‘an sekiz yüz elli guruş mezbûrân zimmetlerinde alacak hakkım zuhûr ettikde ikrâr-ı kat‘î ile ikrâr dahi etmeleriyle meblağ-ı mecmû‘-ı mezkûr sekiz yüz elli guruşu asıl ve vekîl ve müvekkil-i mezbûrândan hâlâ taleb ederim deyü tasaddî eylediğim da‘vâmdan bâ-tavassut-ı muslihîn asıl ve vekîl-i mezbûr el-Hâc Mehmed ile kat‘an-li’n-nizâ‘ üç yüz guruş üzerine bi’t-terâzî ba‘de akdi’l-musâlaha ve’l-kabûl bedel-i sulh-ı mezkûr üç yüz guruşu dahi mezbûr el-Hâc Mehmed bi’l-asâle ve bi’l-vekâle bana edâ ve teslîme ta‘ahhüd etmekle bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan ben asıl ve vekîl ve müvekkil-i mezbûrân el-Hâc Mehmed ve Abdurrahman’ın zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde mezbûr el-Hâc Mehmed dahi ibrâ-i mezkûrumu asâleten ve vekâleten kabûl edip bu vechile kat‘-ı nizâ‘ eyledik deyü ikrâr ve tasdîkleri tescil ve İstanbul Mahkemesi’nden huzûr[-ı âlîlerine i‘lâm olundu] Fî 29 Ş sene 1258