İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 503 Hüküm no: 436 Orijinal metin no: [172-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Mustafa’nın Şerbetçi Filibos’a olan borcunu ödemesi 1650 [guru]ş edâya tenbîh [Ma‘rûz] Şerbetçi taifesinden arzuhâl sâhibi Filibos v. Bratomos zimmî meclis-i şer‘-i münîrde Kömürcü es-Seyyid Mustafa Ağa b. Veliyüddin muvâcehesinde Tersâne-i âmire tüccârlarından arzuhâlde isimleri mastûr Oseb v. İsteban ve Agop v. Karabet zimmîler hâzır oldukları hâlde bâ-temessük-i mütevellî bi’l-icâreteyn müstakıllen mutasarrıf olduğum mahrûse-i Galata’ya muzâfe kasaba-i Kasımpaşa’da Câmi‘-i kebîr mahallesinde Lonca sokağında kâin ma‘lûmü’l-hudûd bir bâb vakıf kömürcü mağazası müştemilâtından olup fevkınde olan iki bâb odanın birinde hâzırân-ı mersûmândan mesfûr Oseb zimmî beher şehr otuz beşer guruş ve diğerinde dahi mesfûr Agop zimmî beher şehr elli ikişer buçuk guruş kirâ ile bin iki yüz elli altı senesi Zilka‘detü’ş-şerîfesi gurresinden i‘tibâr ile yirmi iki aydan berü müşâhereten müstecirlerim olup mezbûr es-Seyyid Mustafa Ağa tarafımdan bi’l-vekâle zikr olunan odaların kirâ-yı mezkûrelerinden müddet-i mezkûrede müstecirlerim hâzırân-ı mersûmândan mâh be-mâh cem‘an makbûzu olan bin dokuz yüz yirmi beş guruşun iki yüz yetmiş beş guruşunu kabz ü istifâ etmemle bâkīsi olup yedinde kalan bin altı yüz elli guruşu mezbûr es-Seyyid Mustafa Ağa’dan hâlâ taleb ederim deyü hâzırân-ı mersûmân tasdîkleriyle da‘vâ ettikde mezbûr es-Seyyid Mustafa Ağa dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin alâ-mûcebi i‘tirâfihâ meblağ-ı bâkī-i merkūm bin altı yüz elli guruşu müdde‘î-i mersûm Filibos zimmîye def‘ ü teslîme mezbûr es-Seyyid Mustafa Ağa’ya tenbîh olunduğu İstanbul Mahkemesi’nden huzûr[-ı âlîlerine i‘lâm olundu] Fî 9 N sene 1258