İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 504 Hüküm no: 437 Orijinal metin no: [172-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hanım’ın Atiyyetullah Hatun’dan ödünç aldığı para ile bazı değerli takı ve eşyaları iade ettiği Ahz u kabz [Ma‘rûz] Sâhibe-i arzuhâl mu‘arrefetü’z-zât Şerife Atiyyetullah Hatun bt. Es-Seyyid Ömer meclis-i şer‘-i münîrde derûn-ı arzuhâlde mezkûretü’l-ism kezâlik mu‘arrefetü’z-zât Şerife Ümmügülsüm Hanım bt. Es-Seyyid İbrahim Edhem muvâcehesinde bin iki yüz elli altı senesi hilâlinde mâlımdan mecmû‘u bin yüz elli guruş kıymetli dört miskāl inci ve bir zümrüd yüzük ve bir akîk askı ve bir kırklık hayriye altınımı mezbûre Şerife Ümmügülsüm Hanım’a i‘âre ve teslîm eylediğimde ol dahi isti‘âre ve kabz ettikden sonra bana vermeyip cümlesi yedinde kalmağla zikr olunan inci ve yüzük ve askı ve altını zimmetinde cihet-i karzdan alacak hakkım olan yüz yirmi guruşu dahi mezbûre Şerife Ümmügülsüm Hanım’dan hâlâ taleb ederim deyü da‘vâ ettikde ol dahi cevâbında târih-i merkūmda müdde‘iye-i mezbûre Şerife Atiyyetullah Hatun’dan sâlifü’l-beyân dört miskāl inci ve bir zümrüd yüzük ve bir akik askı ve bir kırklık hayriye altınını isti‘âre ve kabz edip el-yevm cümlesi yedinde mevcûde olduğunu ve cihet-i mezkûreden dahi ol-mikdâr guruş müdde‘iye-i mezbûreye hâlâ zimmetinde deyni olduğunu tâyi‘aten ve kat‘iyyen ikrâr ü i‘tirâf edip lâkin müdde‘iye-i mezbûre işbu târih-i i‘lâmdan iki buçuk sene mukaddem mâlımdan ve yedimden iktirâz ve kabz ve umûruna sarfla istihlâk eylediği üç bin guruş zimmetinde alacak hakkım olmağla kendine ber-vech-i muharrer deynim olan meblağ-ı merkūm yüz yirmi guruş meblağ-ı mezkûr üç bin guruşdan takasan tenzîl olunup bâkīsi olan iki bin sekiz yüz seksen guruşu ben dahi müdde‘iye-i mezbûre Şerife Atiyyetullah Hatun’dan hâlâ taleb ederim deyü inkâra mukārin eylediği da‘vâsını isbâtdan izhâr-ı acz edip istihlâf ettikde mezbûre Şerife Atiyyetullah Hatun bi’l-muvâcehe ber-nehc-i şer‘î tahlîf olunmağın mûcebince mezbûre Şerife Ümmügülsüm Hanım da‘vâ-yı mezkûresiyle müdde‘iye-i mezbûreye bilâ-beyyine mu‘ârazadan men‘ olunup ve sâlifü’l-beyân mezbûre Şerife Ümmügülsüm Hanım’ın ikrâr ve i‘tirâfıyla lâzım gelen mârrü’z-zikr dört miskāl inci ve bir zümrüd yüzük ve bir akik askı ve bir kırklık hayriye altınını müdde‘iye-i mezbûre Şerife Atiyyetullah Hatun’a red ve meblağ-ı merkūm yüz yirmi guruşu dahi edâ ve teslîme mezbûre Şerife Ümmügülsüm Hanım’a ba‘de’t-tenbîh müdde‘iye-i mezbûre Şerife Atiyyetullah Hatun’a meclis-i şer‘de zikr olunan inci yüzük ve askı ve altını bi-a‘yânihâ ve meblağ-ı merkūm yüz yirmi guruşu dahi bi’t-tamam mezbûre Şerife Ümmügülsüm Hanım bana def‘ ve teslîm ben dahi yedinden ahz u kabz eyledim deyü i‘tirâf eylediği tescîl ve İstanbul Mahkemesi’nden huzûr[-ı âlîlerine i‘lâm olundu] Fî 24 Ş sene [1]258