İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 505 Hüküm no: 438 Orijinal metin no: [173-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tercüman Karabet’in sahibi olduğu kasap gediğini Sarraf Kigork’a sattığı Kasab Ma‘rûz Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla dördüncü selhhâneye merbût kasab dükkânlarından mahrûse-i Galata’da Mekteb-i Tıbbiye-i Adliye kurbünde Tomtom mahallesinde Balıkpazarı’nda eczâcı ve yüncü dükkânları karşısında tarîk-i hâs ve Balıkçı Kızıl zimmî dükkânı beynlerinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmeye bâ-temessük-i mütevellî bi’l-icâreteyn müstakıllen mutasarrıf olan Tercümân Karabet v. Oseb zimmî meclis-i şer‘-i hatîrde bâ‘isü’l-i‘lâm Sarrâf Kigork v. Bedros zimmî muvâcehesinde hâlâ kassâbân kethudâsı es-Seyyid Mehmed Bey b. es-Seyyid Mustafa ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben ber-vech-i muharrer mutasarrıf olduğum âlât-ı gedik-i merkūmu hüsn-i rızâ ve tayyib-i hâtırım ile mersûm Kigork zimmîye bedel-i ma‘lûm [ve] makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve hisse-i tevzî‘ini kethudâ ve kasab ustaları ma‘rifetiyle almağa ta‘ahhüd edip fî-mâ ba‘d gedik-i merkūm sarrâf-ı mersûmun müstakıllen hakk-ı müfevvezi olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûru fâriğ-i mersûm Karabet zimmînin ferâğından defter-i vakf-ı şerîfde mersûm Kigork zimmînin müstakıllen uhdesinde kayd ve der-dest olan temessük-i mezkûr hâmişine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr[-ı âlîlerine i‘lâm olundu] Fî 14 N sene [12]58