İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 506 Hüküm no: 439 Orijinal metin no: [173-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiriç zimmînin kasap gediği hissesini Kasap Taşo’ya sattığı Kasab Ma‘rûz Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla onuncu selhhâneye merbût kasab dükkânlarından mahrûse-i Galata’ya muzâfe Tarabya karyesinde ekmekçi fırını karşısında vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin hums an-nısf hissesine bâ-temessük-i mütevellî bi’l-icâreteyn mutasarrıf olan Kiriç v. Kosta zimmî meclis-i şer‘-i hatîrde kasab tâifesinden bâ‘isü’l-i‘lâm Taşo v. Yanaki zimmî muvâcehesinde hâlâ kassâbân kethudâsı es-Seyyid Mehmed Bey b. es-Seyyid Mustafa ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben âlât-ı gedik-i merkūmdan ber-vech-i muharrer mutasarrıf olduğum hums an-nısf hisseyi hüsn-i rızâ ve tayyib-i hâtırım ve ferâğ-ı mu‘teber-i kat‘î ile mersûm Taşo zimmîye bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve hisse-i tevzî‘ini kethudâ ve kasab ustaları ma‘rifetleriyle almağa ta‘ahhüd edip fî-mâ ba‘d hisse-i mezkûre mersûm Taşo zimmînin hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk hums an-nısf hisse-i mezkûre fâriğ-i mersûm Kiriç zimmînin ferâğından defter-i vakf-ı şerîfde mesfûr Taşo zimmî uhdesine kayd ve der-dest olan temessük-i mezkûru hâmişine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 14 N sene [1]258