İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 507 Hüküm no: 440 Orijinal metin no: [173-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü İsak’ın tütüncü dükkân gediği hissesini diğer hisse sahipleri Tütüncü Ömer Efendi ile Mustafa Reşid Efendi’ye sattığı Tütüncü gediği [Ma‘rûz] Âsitâne-i aliyye’de vâki‘ tütüncü esnâfından İsak v. Musayil zimmî meclis-i şer‘-i münîrde bâ‘isiyyü’l-i‘lâm nefsinden asıl ve şerîki el-Hâc Hafız Mustafa Reşid Efendi b. el-Hâc Mehmed tarafından husûs-ı âti’l-beyânda vekîl-i şer‘îsi duhân tüccârından Ömer Efendi b. İsmail muvâcehesinde takrîr-i kelâm edip İstanbul’da Bahçekapısı hâricinde Eminönü nâm mahâlde sebzeciler içinde manav ve berber dükkânları beynlerinde vâki‘ Eshâm Muhâsebesi’nde benimle Yuvan v. Yorgi ve Menya v. Kiryako zimmîlerin ismimize mukayyed üzerinde bir bâb odayı müştemil üç kepenk bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin birer sülüsden sülüsân hisse-i şâyi‘ası asıl ve vekîl ve müvekkil-i mezbûrân Ömer Efendi ve el-Hâc Hafız Mustafa Reşid Efendi’nin bâ-i‘lâm-ı şer‘î ve bâkī bir sülüs hisse-i şâyi‘ası dahi akd-i âti’z-zikrin sudûruna değin benim bâ-sûret yedimizde mülkümüz olmağla ben ber-vech-i muharrer mâlik olduğum sülüs hisse-i şâyi‘a-i âlât-ı gedik-i merkūmu tarafeynden bi’l-îcâb ve’l-kabûl bey‘-i bâtt-ı sahîh-i şer‘î ve safka-i vâhide ile asıl ve vekîl ve müvekkil-i mezbûrân Ömer Efendi ve el-Hâc Hafız Mustafa Reşid Efendi’ye ale’l-iştirâki’s-seviyy on bin guruş semen-i medfû‘ ve makbûza bey‘ ü temlik ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl etmeğin fî-mâ ba‘d sülüs hisse-i şâyi‘a-i merkūmede benim aslâ ve kat‘a alâka ve medhalim kalmayıp mecmû‘-ı gedik-i merkūm mezbûrân Ömer Efendi ve el-Hâc Hafız Mustafa Reşid Efendi’nin seviyyen mülk-i mahzları ve hakk-ı sırfları olmağla bey‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlümüzü hâvî ibrâ ve iskāt eyledik deyü ba‘de’l-ikrâr ve’t-tasdîk asıl ve vekîl-i mezbûr Ömer Efendi meclis-i şer‘de esnâf-ı merkūme kethudâ vekîli İbrahim Efendi ve yazıcısı Mehmed Emin Efendi ve yiğitbaşısı el-Hâc Hasan Ağa ve sâir mazbûtü’l-esâmî lonca ihtiyârları hâzır oldukları hâlde bi’l-asâle ve bi’l-vekâle takrîr-i kelâm edip benimle şerîkim ve müvekkilim mezbûr el-Hâc Hafız Mustafa Reşid Efendi’nin ber-vech-i meşrûh şirâen mâlik olduğumuz sülüs hisse-i şâyi‘a-i gedik-i mezkûrun kaleminde mersûm İsak v. Musayil zimmî üzerinde olan kayd-ı atiki ref‘ ü terkīn benimle müvekkilim mezbûrun ismimize tashîhan kayd ile kaleminden müceddeden yedimize bir kıt‘a sûret i‘tâsı bi’l-asâle ve bi’l-vekâle niyâzımdır dedikde fi’l-vâki‘ kalem-i mezbûrda mersûm İsak v. Musayil zimmî ismine mukayyed sülüs hisse-i şâyi‘a-i gedik-i mezkûra şirâen mâlikler olan mezbûrân Ömer Efendi <> ve el-Hâc Hafız Mustafa Reşid <> Efendi’nin isimlerine tashîhan yedlerine sûret i‘tâsı nizâmlarından idiğini esnâf-ı hâzırûn-ı mezbûrûn ihbâr etmeleriyle bu sûretde mezbûrân Ömer Efendi b. İsmail ve el-Hâc Hafız Mustafa Reşid Efendi b. el-Hâc Mehmed’in ber-vech-i istid‘â isimlerine tasrîhan yedlerine başka başka sûret i‘tâsı muktezâ-yı şurût ve nizâm idiği İstanbul Mahkemesi’nden huzûr[-ı âlîlerine i‘lâm olundu] Fî 15 N sene 1258