İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 508 Hüküm no: 441 Orijinal metin no: [173-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güloğlu Atam’ın Bakkal İlya’ya açtığı alacak davasında sulh olduğu 1000 [guru]şa sulh [Ma‘rûz] Derûn-ı arzuhâlde ismi mastûr Güloğlu Atam v. Yorgi nâm zimmî meclis-i şer‘-i hatîrde bakkāl tâifesinden arzuhâl sâhibi İlya v. Lazari nâm zimmî muvâcehesinde ben ücret ile hizmet eder makūlesinden olup mersûm İlya zimmînin talebiyle bin iki yüz elli üç senesi hilâlinde İstanbul’da Ahmediye nâm mahâlde vâki‘ mütemekkin olduğu bakkāl dükkânında ücret kavlinsiz sekiz ay müddet destgâhdârlık hizmetinde olmamla ecr-i mislim olup müddet-i mezkûrede iktizâ eden bin guruş zimmetinde bâ-tahvîl hakkım olmağla meblağ-ı mezkûr bin guruş ile bundan mukaddem mâlımdan ve yedimden iktirâz ve kabz ve umûruna sarfla istihlâk eylediği beş yüz guruş ki cem‘an zimmetinde alacağım olan bin beş yüz guruşu mersûm İlya zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm ile kat‘an-li’n-nizâ‘ bi’t-tav‘ ve’r-rızâ bin guruş üzerine ba‘de akdi’l-musâlaha ve’l-kabûl [174] bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan ben mersûm İlya zimmînin zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi benden mutâlebe <> edip ben dahi inkâr eylediğim cem‘an beş bin beş yüz guruşluk ecnâs-ı altın da‘vâsına ve husûs-ı mezkûra müte‘allika âmme-i da‘vâdan kezâlik benim zimmetimi ibrâ-i âm ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin guruşu müdde‘î-i mersûm Atam zimmîye bi’t-taleb edâ ve teslîme mersûm İlya zimmîye tenbîh olunduğu İstanbul Mahkemesi’nden huzûr[-ı âlîlerine i‘lâm olundu] Fî 14 N sene 1258