İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 509 Hüküm no: 442 Orijinal metin no: [174-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İranlı tacir İsmail Ağa’nın şal ve saatini zapt ettiği iddiasıyla Kasımpaşalı Zeliha Hatun’a açtığı davayı ispat edemediğinden davanın reddedildiği Şâl ve sâ‘at men‘i Ma‘rûz-ı dâ‘î-i Devlet-i aliyyeleridir ki İran tüccârından derûn-ı takrîrde mezkûrü’l-ism el-Hâc İsmail Ağa b. Mehmed taraf-ı sefâretden Abdullah hâzır olduğu hâlde meclis-i şer‘-i münîrde kezâlik derûn-ı takrîrde mezkûretü’l-ism mu‘arrefetü’z-zât Kasımpaşalı Zeliha Hatun bt. Halil muvâcehesinde mezbûre Zeliha Hatun İstanbul’da Mahmudpaşa mahallesinde vâki‘ menzilimde ücretle hizmet eder iken işbu târih-i i‘lâm şehrinin ikinci Perşembe günü mâlımdan yedi yüz elli guruş kıymetli bir çubuklu Acem şalı ve sekiz yüz elli guruş kıymetli bir hilâlî pesen-dîde koyun sâ‘atimi bi-gayrı hakkın fuzûlî ahz u kabz etmekle zikr olunan şal ve sâ‘ati mezbûre Zeliha Hatun’dan hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr el-Hâc İsmail Ağa ber-vech-i muharrer müdde‘âsına ikāmet-i beyyine edemeyip bi’t-taleb mezbûre Zeliha Hatun ber-nehc-i şer‘î tahlîf olunmağın müdde‘î-i mezbûr el-Hâc İsmail Ağa da‘vâ-yı mezkûresiyle mezbûre Zeliha Hatun’a bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Bâkī emr ü fermân hazret-i men-lehü’l-emr. Fî 21 N sene 1258