İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 509 Hüküm no: 443 Orijinal metin no: [174-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çelebioğlu Alaaddin mahallesi ahalisinin mahalleden ihracını talep ettikleri Balıkçı Ali Ağa’nın uygunsuz tavırlarda bulunmayacağını taahhüt etmesiyle şikâyetlerinden vazgeçtikleri Tehîr-i iştikâ-i ahâli-i mahalle-i Çelebioğlu Alâaddin Ma‘rûz-ı dâ‘î Ashâb-ı arzuhâl İstanbul’da Alacahamam kurbünde Çelebioğlu Alâaddin mahallesi İmâmı es-Seyyid Hafız Mehmed Şükrü Efendi b. Mehmed Sadık ve muhtâr-ı sânîsi Attâr Hafız Mehmed Ağa b. Ahmed ve ahâlisinden Fesciler Kethudâsı el-Hâc Ahmed Ağa b. Yunus ve Şekerci Mehmed Efendi b. İbrahim ve Camcı Mustafa Ağa b. Ahmed ve Yorgancı Nuri Efendi b. Ahmed ve Helvacı Mustafa Ağa b. Ahmed ve Râşid Efendi b. Mustafa ve Berber İbrahim Ağa b. el-Hâc Mehmed nâm kimesneler ve sâirleri İstanbul Mahkemesi’nde meclis-i şer‘-i münîrde mahalle-i merkūme ahâlisinden ve hayriye tüccârından derûn-ı arzuhâlde mezkûrü’l-ism Balıkçı Ali Ağa b. Ahmed nâm kimesne muvâcehesinde mahalle-i mezbûre muhtâr-ı evveli yine hayriye tüccârından Şekerci Mahmud Efendi b. Mustafa hâzır olduğu hâlde merkūm Ali Ağa eğerçi mahallemiz sekenesinden olup lâkin kendi hâliyle meşgūl olmayıp dâimâ bizimle bî-vech gavga ve münâza‘adan hâlî olmayıp hattâ işbu târih-i i‘lâmdan bir gün mukaddem hâzır-ı mezbûr Mahmud Efendi ile İstanbul’da Bahçekapısı nezdinde vâki‘ Yenicâmi‘-i şerîf derûnunda bir husûs için bî-vech münâza‘a ve gavga edip merkūm Mahmud Efendi’ye itâle-i lisân etmekle mezbûrun bu vechile harekât-ı nâ-bercâsından cümlemizin rahatı meslûb olmuşdur deyü sû’-i hâlinden bahisle hâzır-ı mezbûr ile mâ‘an iştikâ ve mahalle-i merkūmeden hurûcunu istid‘â etmişidik el-hâletü hâzihî mezbûr Ali Ağa işbu meclis-i şer‘de ber-vech-i muharrer ef‘âl-i sâbıkāsından rücû‘ edip kendi hâliyle meşgūl olmağa ta‘ahhüd etmekle biz dahi vâki‘ olan iştikâlarımızı tehîr eyledik deyü ahâli-i mahalle-i merkūmûn ile muhtâr-ı evveli hâzır-ı merkūmun sâdır olan bi’l-cümle takrîr-i meşrûhunu mezbûr Ali Ağa tasdîk ve tahkīk eylediği tescîl ve huzûr-ı [âlîlerine i‘lâm olundu] Fî 20 N sene 1258