İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 510 Hüküm no: 444 Orijinal metin no: [174-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethaneci Dimitri’nin kefaletten doğan borcunu Kasap Aleko’ya ödemesi için yapılan tenbih 8500 guruş bi-hükmi’l-kefâleti hüküm [Ma‘rûz] Kasab tâifesinden arzuhâl sâhibi Aleko v. Yani şifâhen sâdır olan fermân-ı âlîlerine imtisâlen Salı günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde şerbethâneci tâifesinden derûn-ı arzuhâlde ismi mastûr Dimitri v. Andon zimmî muvâcehesinde benim şerbetçi tâifesinden gāib ani’l-beled Paşalimanlı diğer Dimitri v. Hıristo v. Atam nâm reis zimmetinde yedime verdiği milâd-ı hazret-i İsa’nın bin sekiz yüz kırk bir senesi Teşrîn-i evvelinin yirmi beşinci günü târihiyle müverrah Rumiyyü’l-imlâ işbu bir kıt‘a deyn tahvîli mantûkunca cihet-i karzdan sekiz bin beş yüz guruş alacak hakkım olup mersûm Dimitri zimmî târih-i merkūmda İstanbul hısnı ebvâbından Balıkpazarı kapısı hâricinde vâki‘ Kahveci Mehmed Emin Ağa dükkânında meblağ-ı mezkûr sekiz bin beş yüz guruşa zeyl-i tahvîl-i mezkûr nâtık olduğu üzere tarafeynden bi’l-emr ve’l-kabûl kefâlet-i mutlaka-i sahîha ile kefîl ve zâmin olmağla meblağ-ı merkūm sekiz bin beş yüz guruşu kefâlet-i mahkiyesine binâen mesfûr Dimitri zimmîden hâlâ taleb ederim deyü ba‘de’d-da‘vâ ve’l-inkâr müdde‘î-i mersûm Aleko zimmînin ber-minvâl-i muharrer müdde‘âsına bâb-ı mezkûr hâricinde Şerbethâne sokağında bakkāl olan Yorgi v. Vasil nâm zimmî huzûr-ı hazret-i müşârün-ileyhde bi’l-muvâcehe vech-i şer‘î üzere edâ-i şehâdet-i şer‘iye ettikde müdde‘î-i mersûm Aleko zimmî mâ‘adâ bir şâhid dahi ikāmesine havâle olundukdan sonra lisânen sâdır olan fermân-ı âlîlerine imtisâlen müdde‘î-i mersûm mesfûr Dimitri zimmî ile bâb-ı cenâb-ı müşârün-ileyhde İstanbul kādıları dâ‘îlerine tahsîs buyurulan dâirede ma‘kūd meclis-i şer‘de terâfu‘larında mersûm Dimitri zimmî müdde‘î-i mesfûr Aleko zimmînin ber-minvâl-i meşrûh müdde‘âsını bi-tamamihi tâyi‘an ve kat‘iyyen ikrâr ü i‘tirâf etmeğin mûcebince meblağ-ı mezkûr sekiz bin beş yüz guruşun bi-hükmi’l-kefâleti müdde‘î-i mersûm Aleko zimmîye edâsıyla mersûm Dimitri zimmî ilzâm olunduğu huzûr-ı [âlîlerine i‘lâm olundu] Fî 19 N sene 1258