İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 511 Hüküm no: 445 Orijinal metin no: [174-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocabaşı Bedros’un, kabzımâl Mardıros ile diğer on zimmîye olan borçlarını ödemesi 150165 [guru]ş hüküm [Ma‘rûz] Diyârbekir sancağında Çüngüş Kazâsı’na tâbi‘ Ulaş karyesi re‘âyâsından arzuhâl sâhibleri Kābız-ı mâl Mardıros v. Vartan nâm zimmî yine karye-i mezkûre re‘âyâsından Eskici Nikefos v. Mardıros ve Enserci Avadis v. Serkiz ve Ekmekçi Ohan v. Bedros ve diğer Mardıros v. Serkiz ve Kirhor v. Avadis ve âhar Mardıros v. Agop ve Bedros v. Mardıros ve Bogos v. Haçik ve Avakim v. Manuk ve Tarus v. Maçik ve Eskici Ohan v. Serkiz nâm on nefer zimmîler hâzır oldukları hâlde meclis-i şer‘-i hatîrde yine karye-i merkūme re‘âyâsından derûn-ı arzuhâlde mastûrü’l-ism âhar Bedros v. Kirhor nâm zimmî muvâcehesinde mersûm âhar Bedros zimmî bin iki yüz elli dört senesi karyemizin kocabaşısı iken benimle hâzırûn-ı mersûmûndan her birimizin sene-i merkūmede üzerlerimize edâsı lâzım gelen tekâlif-i örfiyemiz için mâllarımızdan yirmi beş bin yüz altmış beş guruş tecemmü‘ ve mersûm âhar Bedros zimmî yedine teslîm ve ber-minvâl-i muharrer tekâlif-i örfiye ve mesârifât-ı sâiremiz için cânib-i mîrîye ve sâir lâzım gelen mahallere edâ eyle deyü mersûm âhar Bedros zimmîye emir ve taraflarımızdan her birimiz başka başka tevkîl eylediğimizde ol dahi ber-vech-i muharrer ahz u kabz eyledikden sonra meblağ-ı mezkûr yirmi beş bin yüz altmış beş guruşun on bin guruşunu ber-minvâl-i muharrer cânib-i mîrîye edâ edip bâkīsi olan on beş bin guruşu bi-gayrı hakkın kendi umûruna sarfla istihlâk etmekle meblağ-ı bâkī-i mezkûr on beş bin yüz altmış beş guruşu mersûm âhar Bedros zimmîden hâlâ tazmîn taleb ederiz deyü hâzırûn-ı mersûmûn ile mâ‘an ba‘de’d-da‘vâ ve’l-istintâk ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı bâkī-i mezkûr on beş bin yüz altmış beş guruşu müdde‘î-i mersûm Mardıros zimmî ile hâzırûn-ı mersûmûn Nikefos ve Avadis ve Ohan ve diğer Mardıros ve Kirhor ve âhar Mardıros ve Bedros ve Bogos ve Avakim ve Tarus [ve] Vartan zimmîlere edâ ve teslîme mersûm âhar Bedros zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 22 N sene 1258