Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 477 Hüküm no: 566 Orijinal metin no: [95a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Niko v. Andriye’nin Yamandi v. Trandafilo’ya borçlu olduğu Medîne-i Üsküdar müzâfâtından Gekvize nâhiyesine tâbi‘ Darıca nâm karye ahâlîsinden olup mahmiye-i İstanbul’da Bahçekapısı kurbunda müsâfiren sâkin Yamandi v. Trandafilo nâm zimmî meclis-i şer‘-i şerîf-i enverde yine karye-i mezbûre ahâlîsinden olup Boğazhisar[ı] demekle ma‘rûf kal‘ada ticâret üzre sâkin iken bundan akdem bilâ-vâris hâlik olan Niko v. Andriye v. Todori nâm hâlik karye-i mezbûrede bilâ-vâris vefât edenlerin terekesi beytülmâl için ahza me’mûr olmağla tereke-i hâlik-i mezbûra vâzı‘ü’l-yed olan karye-i mezbûre subaşısı el-Hâc Ahmed Ağa b. Mehmed mahzarında üzerine da‘vâ ve takrîr-i kelâm edip hâlik-i mezbûr Nikola hayâtında malımdan iki yüz esedî guruş sermâye olmak üzre yedine def‘ ve teslîm ol dahi ber vech-i muharrer ahz u kabz edip kable’l-def‘ mücehhelen hâlik olmağın hâlâ suâl olunup tereke-i hâlik-i mezbûrdan meblağ-ı mezbûrun alıverilmesi matlûbumdur dedikde gıbbe’s-suâl mezbûr el-Hâc Ahmed Ağa cevâbında tereke-i mezbûreyi vech-i mübeyyen üzre vaz‘-ı yedini ikrâr lâkin deyn-i mezkûru inkâr edicek müdde‘î-i mezbûrdan sıdk-ı makāline beyyine taleb olundukda mahrûse-i Galata müzâfâtından kasaba-i Tophâne’de Hoca Ali mahallesi sükkânından Hüseyin b. Mustafa ve diğer Hüseyin b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Yamandi malından iki yüz esedî guruşu sermâye olmak üzre bizim huzûrumuzda hâlik-i mezbûr Nikola v. Andriye v. Todori[ye] hayâtında def‘ ve teslîm ol dahi ber vech-i muharrer ahz u kabz etti biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın min ba‘d müdde‘î-i mezbûr ba‘de’t-tahlîfi’l-mu‘teber mûcebiyle ba‘de’l-hükmi’ş-şer‘î meblağ-ı mezbûru tereke-i hâlik-i mezbûrdan müdde‘î-i mezbûra edâ ve teslîme mezbûr el-Hâc Ahmed Ağa’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Yusuf, Ali b. Mehmed, ve gayruhüm.