Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 478 Hüküm no: 567 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hacı Sefer’in Toros v. Doleri’de kefaletten dolayı alacağı olduğu Mahrûse-i Galata’da Rüstem Paşa hanında sâkin işbu bâ‘isü’l-kitâb Mehmed b. el-Hâc Sefer meclis-i şer‘de merhûm Sultan Mehmed Gāzi câmi‘-i şerîfi meremmetçisi olan Toros v. Doleri nâm zimmî muvâcehesinde üzerine da‘vâ ve takrîr-i kelâm edip mezbûr Toros’un oğlu gāib ani’l-meclis İbrahim nâm mühtedî ile Ohan? nâm zimmî zimmetlerinde yedimden iştirâ ve kabz eyledikleri beynimizde ma‘lûm kebe bahâsından bâkī yüz otuz üç guruş ve on rub‘ guruş hakkıma mezbûr Toros bundan akdem tarafından emr ve kabûlü hâviye kefâlet-i sahîha-i şer‘iyye ile kefîl olmağın hâlâ bi hasebi’l-kefâle meblağ-ı merkūmu Toros’dan taleb ederim suâl olunsun dedikde gıbbe’s-suâl mezbûr Toros cevâbında kaziyye minvâl-i muharrer üzre olup müdde‘î-i mezbûra yüz otuz üç ve üç rub‘ guruş kefâletnâme ile kefîl olduğunu bi tav‘ihî ikrâr ve i‘tirâf etmeğin mûcebiyle meblağ-ı bâkī-i mezbûr yüz otuz üç guruş üç rub‘u kefâlet-i mahkiyesine binâen müdde‘î-i mezbûra edâ ve teslîme mezbûr Toros’a tenbîh olunup mâ vaka‘a bi’t-taleb ketb olundu. Fî 27 min Şa‘bân sene [10]97. Şuhûdü’l-hâl: Umdetü erbâbü’l-iz ve’l-kalem Vefâlı Mehmed Efendi Kâtib-i Sultan Mehmed, İbrahim Çelebi b. Ahmed?, Mahmud b. Mustafa, Hüseyin b. Mustafa, Hüseyin Efendi b. Sefer kâtib ve gayruhüm.