İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 516 Hüküm no: 451 Orijinal metin no: [176-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasilaki zimmînin kürkçü esnafından Yorgi, Apostol ve Zaharya’ya açtığı alacak davasını ispat için mühlet verildiği ancak kendisinin itiraf ettiği borcunu ödemesinin gerektiği 1480 [guru]ş hüküm [Ma‘rûz] Arzuhâl eden Vasilaki v. Todori zimmî meclis-i şer‘-i hatîrde kürkçü esnâfından derûn-ı arzuhâlde isimleri mastûr Yorgi v. Bucan ve şerîkleri Apostol v. Yanko ve Zaharya v. Kostandi zimmîler muvâcehelerinde şehr-i sâbıkın on beşinci günü mahrûse-i Galata’ya muzâfe kasaba-i Tophâne’de Dörtyolağzı nâm mahâlde vâki‘ kahve dükkânında mâlımdan mersûmûn Yorgi ve Apostol ve Zaharya zimmîlere beş bin guruş def‘ ve teslîm ve meblağ-ı merkūm ile benim için keçi derileri iştirâ ediniz deyü mersûmûnu tevkîl eylediğimde onlar dahi bi’l-ma‘iyye kabz ve kabûl ettiklerinden sonra meblağ-ı mezkûr ile nesne iştirâ etmeyip yedlerinde kalıp lâkin mesfûrûn Yorgi ve Apostol ve Zaharya zimmîlere zimmetimde bundan mukaddemce mâl-ı müştereklerinden bi-safkatin vâhidetin iştirâ ve kabz eylediğim iki tulum Rumeli nâfesi ve dört tulum Bükreş nâfesi kürk semeninden bin dört yüz seksen guruş deynim olup meblağ-ı mezkûr beş bin guruşun bin dört yüz seksen guruşunu deyn-i mezkûruma takas etmemle bâkīsi olan üç bin beş yüz yirmi guruşu şürekâ-i mesfûrûndan hâlâ istirdâd ederim deyü da‘vâ ettikde onlar dahi cevâblarında müdde‘î-i mesfûrdan ber-minvâl-i muharrer ol-mikdâr guruş kabzlarını inkârlarından mâ‘adâ müdde‘î-i mersûm zimmetinde mukırr u mu‘terif olduğu üzere cihet-i mezkûreden alacak hakkımız olan meblağ-ı merkūm bin dört yüz seksen guruşu hâlâ taleb ederiz deyü da‘vâ etmeleriyle mûcebince müdde‘î-i mersûm Vasilaki zimmî da‘vâ-yı mezkûresini beyâna havâle olunup ve mukırr u mu‘terif olduğu meblağ-ı mezkûr bin dört yüz seksen guruşun dahi müdde‘ûn-ı mersûmûn Yorgi ve Apostol ve Zaharya zimmîlere edâsıyla mersûm Vasilaki zimmî ilzâm olunduğu İstanbul Mahkemesi’nden huzûr[-ı âlîlerine i‘lâm olundu] Fî 7 L sene 1258