.:: İstanbul Kadı Sicilleri ::.


İstanbul Mahkemesi 172 Numaralı Sicil (H. 1257-1258 / M. 1841-1842)
cilt: 96, sayfa: 517
Hüküm no: 453
Orijinal metin no: [177-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Kireçci Telko’nun kefaletten dolayı alacak iddiasıyla açtığı davayı ispat edemediği

6250 [guru]ş men‘

[Ma‘rûz]

Kireçci tâifesinden arzuhâl sâhibi Telko v. Pavlo zimmî meclis-i şer‘-i hatîrde derûn-ı arzuhâlde isimleri mastûr Çörekçi Onmabrem? v. Tofko ve Avas karyeli Boyno v. Kostandi zimmîler muvâcehelerinde gāib ani’l-beled Filibeli Tanaş v. Yanço nâm zimmî bundan akdem bir cünhaya mebnî Bâb-ı Seraskerî’de Tomruk Mahbesi’nde mahbûs iken hapisden sebîl-i tahliyesi’çün kendine altı bin iki yüz elli guruş lâzım oldukda işbu sene-i mübâreke şehr-i Rebî‘ülâhirinin yirmi üçüncü günü mahbes-i mezkûrda gāib-i mersûm Tanaş zimmî mâlımdan ve yedimden ol-mikdâr guruş iktirâz ve kabz ve târih-i merkūm ile müverrah yedime bir kıt‘a deyn tahvîli verdikde mersûmân Onmabrem ve Boyno zimmîlerden her biri dahi meblağ-ı mezkûr altı bin iki yüz elli guruşa tarafeynden bi’l-emr ve’l-kabûl müte‘âkiben kefîl ve zâmin olmalarıyla meblağ-ı merkūm altı bin iki yüz elli guruşa kefâlet-i mahkiyelerine binâen mersûmân Onmabrem? ve Boyno zimmîlerden hâlâ taleb ederim deyü ba‘de’d-da‘vâ ve’l-inkâr müdde‘î-i mersûm Telko zimmî da‘vâ-yı mezkûresini isbât için sene-i mübâreke-i merkūme Şa‘bâni’l-mu‘azzamının on beşinci gününden beri şâhide havâle olunup müddet-i mehl-i şer‘î kirâren ve mirâren mürûr edip bir def‘a şâhid olmak üzere meclis-i şer‘a ikāme eylediği üç nefer zimmîler dahi mazanna-i sû’ olduklarından tard olunmalarıyla bir vechile şâhid-i âdil ikāmesine kādir olmayıp ve tahlîfe dahi tâlib olmadığından kavl-i mücerrediyle şer‘an nesne sâbit olmamağla mûcebince müdde‘î-i mersûm Telko zimmî da‘vâ-yı mezkûresiyle mersûmân Onmabrem ve Boyno zimmîlere bilâ-beyyine mu‘ârazadan men‘ olunduğu İstanbul Mahkemesi’nden huzûr[-ı âlîlerine i‘lâm olundu]

Fî 9 L sene 1258