İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 518 Hüküm no: 454 Orijinal metin no: [177-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger Mosis’in dükkân kiracısı Cerrah Hasan Ağa’ya açtığı alacak davasında sulh olduğu Cerrâh dükkânı nizâ‘ından 1250 [guru]şa sulh [Ma‘rûz] Dülger kalfalarından arzuhâl sâhibi Mosis v. Bedros zimmî bi’l-ma‘iyye rü’yete memûr Evkāf Müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde meclis-i şer‘-i münîrde derûn-ı arzuhâlde ismi mezkûr Cerrâh Hasan Ağa b. Ali muvâcehesinde bundan mukaddem mezbûr Hasan Ağa’nın bi-şarti’r-rücû‘ emriyle mâlımdan mutasarrıf olduğu İstanbul’da Sultan Bâyezid Han Câmi‘-i şerîfi civârında Eminbey mahallesinde vâki‘ fevkınde üç bâb oda ve bir memşâ ve süflâsında bir matbah ve müştemilât-ı sâire-i ma‘lûmeyi muhtevî bir bâb cerrâh dükkânının binâ ve inşâsına masrûfum olan beş bin yüz doksan dokuz guruşun bin beş yüz guruşunu bana edâ etmekle bâkīsi olan üç bin altı yüz doksan dokuz guruşu dahi bi’l-mürâca‘a mezbûr Hasan Ağa’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr ile kat‘an-li’n-nizâ‘ bin iki yüz elli guruş üzerine bi’t-terâzî ba‘de akdi’l-musâlaha ve’l-kabûl bedel-i sulh-ı mezkûr bin iki yüz elli guruşu mezbûr Hasan Ağa bana edâ ve teslîme ta‘ahhüd etmekle bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr[-ı âlîlerine i‘lâm olundu] Fî 27 Ş sene [1]258