İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 519 Hüküm no: 455 Orijinal metin no: [177-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın Havva Hanım’a olan borcunu ödemesi 4000 [guru]şa sulh [Ma‘rûz] Mahrûse-i Galata’ya muzâfe kasaba-i Tophâne’de Karabaş Mustafa Ağa mahallesinde sâkine derûn-ı arzuhâlde mezkûretü’l-ism Esirci Hacce Havva Hanım bt. Abdullah b. Abdurrahman tarafından husûs-ı âti’l-beyânda vekîl olduğu zât-ı mezbûreyi ârifân Esirci İsmail b. Abdullah ve Hüseyin b. Abdullah nâm kimesneler şehâdetleriyle ber-nehc-i şer‘î sâbit olan Hasan Ağa b. Abdullah meclis-i şer‘de sâhib-i arzuhâl Mustafa Ağa b. Abdullah muvâcehesinde Esirci Yusuf Ağa b. Abdullah hâzıra [hâzır] olduğu hâlde bundan akdem müvekkilem merkūme Hacce Havva Hanım merkūm Mustafa Ağa’dan beş bin guruş semen-i medfû‘ ve makbûza bir re’s zenciye câriye iştirâ ve kabz eyledikden sonra câriye-i mezkûrenin reddi îcâb eder <> ayb-ı kadîmi zâhir olmağla müvekkilem merkūme Hacce Havva Hanım câriye-i mezkûreyi hıyar-ı aybla mezbûr Mustafa Ağa’ya redd ve teslîm eylediğinde ol dahi rızâsıyla kabûl ve makbûzu olup istihlâk eylediği semen-i mezkûr beş bin guruş zimmetinde müvekkilem merkūme Hacce Havva Hanım’a deyni olduğunu işbu bin iki yüz elli sekiz senesi Recebi’l-ferd’inin dokuzuncu günü ikrâr ve târih-i mezkûr ile müverrah karz unvânıyla işbu bir kıt‘a temessüğü yedine i‘tâ ve meblağ-ı mezkûra hâzır-ı mezbûr Yusuf Ağa dahi tarafeynden bi’l-emr ve’l-kabûl kefîl ve zâmin olarak temessük-i mezkûr bâlâsına kefâletini tahrîr ve temhîr eylediğinden sonra meblağ-ı mezkûr beş bin guruşun beş yüz guruşunu mezbûr Mustafa Ağa müvekkilem merkūme Hacce Havva Hanım’a vermek üzere kefîl-i hâzır-ı mezbûr Yusuf Ağa’ya def‘ ve teslîm etmiş ise de lâkin meblağ-ı merkūm beş yüz guruşu müvekkilem mezbûreye vermeyip hâlâ bana def‘ ve teslîme müte‘ahhid olmağla bâkīsi olan dört bin beş yüz guruşu dahi mezbûr Mustafa Ağa’dan hâlâ taleb ederim deyü bi’l-vekâle tasaddî eylediğim da‘vâmdan bâ-tavassut-ı muslihîn merkūm Mustafa Ağa ile bi’t-tav‘ ve’r-rızâ dört bin guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan merkūm Mustafa Ağa’nın zimmetini kabûlü hâvî bi’l-vekâle ibrâ ve iskāt eyledim deyü ba‘de’l-ikrâr <> ve’t-tesâdık ibrâdan müstesnâ bedel-i sulh-ı mezkûr dört bin guruşu müdde‘î-i vekîl-i mezbûr Hasan Ağa’ya bi’t-taleb edâ ve teslîme mezbûr Mustafa Ağa’ya tenbîh olunduğu İstanbul Mahkemesi’nden huzûr[-ı âlîlerine i‘lâm olundu] Fî 5 L sene [1]258