İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 520 Hüküm no: 456 Orijinal metin no: [177-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger kalfası Kiragos’un alacak iddiasıyla Hayriye tüccarından Şahinzade Ahmed Ağa’ya açtığı davanın hukuksuz bulunduğu Kavli tahakkuk etmedikçe da‘vâsı meşrû‘a olmadığı [Ma‘rûz] Dülger kalfalarından Kiragos v. Bedros zimmî meclis-i şer‘-i hatîrde hayriye tüccârından bâ‘isü’l-i‘lâm Şahinzâde el-Hâc Ahmed Ağa b. el-Hâc Abdürrezzak muvâcehesinde mezbûr el-Hâc Ahmed Ağa’nın mutasarrıf olduğu İstanbul’da Mercan civârında vâki‘ Pastırmacı Hanı demekle arîf bir bâb han mukaddemâ muhterik oldukda ben arsası üzerine mezbûr el-Hâc Ahmed Ağa’nın bi-şarti’r-rücû‘ emriyle [178] mâlımdan on altı bin guruş harc ü sarfla sene-i sâbıkā yani bin iki yüz elli yedi senesi hilâlinde fevkānî ve tahtânî yedi bâb odayı müştemil bir bâb han binâ ve inşâ ve tekmîl ve kendine teslîm ol dahi meblağ-ı mezkûr on altı bin guruşun iki bin guruşu ile beni cihet-i deyn-i şer‘îden ol-mikdâr guruşu medyûnu İstanbul’da Laleli Câmi‘-i şerîf’i müezzinlerinden gāib ani’l-meclis Mustafa Efendi b. İsmail nâm kimesne üzerine deyn-i mezkûrdan edâ etmek üzere havâle-i mukayyede-i sahîha-i şer‘iye ile havâle ve her birimiz havâle-i mezkûreyi kabûl eylediğimizden sonra bâkīsi olan on dört bin guruşu dahi mezbûr el-Hâc Ahmed Ağa ceste ceste bana edâ ve teslîm ben dahi yedinden ahz u kabz edip işbu sene-i mübâreke Muharremi’l-harâmının yirmi beşinci günü mezbûr el-Hâc Ahmed Ağa zimmetinde aslâ hakkım yokdur deyip mezbûru âmme-i de‘âvîden kabûlünü hâvî ibrâ ve iskāt ve târih-i merkūm ile müverrah yedine bir kıt‘a ibrâ senedi dahi vermiş idim lâkin gāib-i mezbûr Mustafa Efendi meblağ-ı muhâlün-bih-i merkūm iki bin guruşu bana edâda mümâtale etmekle binâen-aleyh meblağ-ı mezkûru [ve]kîl-i merkūm el-Hâc Ahmed Ağa’dan hâlâ taleb ederim deyü takrîr-i meşrûhu üzere ba‘de tamami’l-havâle -muhtâlün-aleyh olan gāib-i mezbûrun mücerred mümâtalesiyle henüz kavli mütehakkık değil iken muhill-i mezbûrdan tasaddî eylediği rücû‘ da‘vâsı meşrû‘a ve iltifâta şâyân olmadığı müdde‘î-i mersûm Kiragos zimmîye tefhîm ve mûcebince da‘vâ-yı mezkûresiyle mezbûr el-Hâc Ahmed Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr[-ı âlîlerine i‘lâm olundu] Fî 9 L sene 1258