İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 523 Hüküm no: 458 Orijinal metin no: [179-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Laleli Camii müezzinlerinden Hasan Efendi’nin borcunu ödemesi 1800 [guru]ş hüküm [Ma‘rûz] Dülger kalfalarından bâ‘isü’l-i‘lâm Kiragos v. Bedros zimmî meclis-i şer‘-i hatîrde İstanbul’da vâki‘ Laleli Câmi‘-i şerîfi müezzinlerinden Hasan Efendi b. Hüseyin muvâcehesinde yine zikr olunan müezzinlerden Mustafa Efendi b. İsmail hâzır olduğu hâlde benim hayriye tüccârından gāib ani’l-meclis Şahinzâde el-Hâc Ahmed Ağa b. el-Hâc Abdürrezzak zimmetinde bi-şarti’r-rücû‘ emriyle mâlımdan umûr-ı ma‘lûmesine masrûfum olan on altı bin guruş alacak hakkım olup on dört bin guruşunu kendisi bana edâ ve teslîm ve mâ‘adâsı olan iki bin guruş deyni ile beni cihet-i deyn-i şer‘îden ol-mikdâr guruş medyûnu hâzır-ı mezbûr Mustafa Efendi üzerine sene-i sâbıkā Zilhiccetü’ş-şerîfesinin üçüncü günü deyn-i mezkûrdan edâ etmek üzere üçümüz bir mahâlde iken havâle-i mukayyede-i sahîha-i şer‘iye ile havâle ve her birimiz havâle-i mezkûreyi kabûl eylediğimizden hâzır-ı mezbûr Mustafa Efendi’nin cihet-i mezkûreden zimmetinde bana deyni olan meblağ-ı mezkûr iki bin guruşa işbu merkūm Hasan Efendi tarafeynden bi’l-emr ve’l-kabûl kefâlet-i mutlaka ile kefîl ve zâmin olup hattâ mezbûr Hasan Efendi meblağ-ı merkūm iki bin guruş cihet-i kefâlet-i mezkûreden zimmetinde bana deyni olduğunu ikrâr ve târih-i merkūm ile müverrah karz ünvânıyla işbu bir kıt‘a temessüğü dahi yedime verdikden sonra iki yüz guruşunu bana edâ etmekle bâkīsi olan bin sekiz yüz guruşu dahi kefâlet-i mahkiyesine binâen mezbûr Hasan Efendi’den hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı bâkī-i merkūm bin sekiz yüz guruşun bi-hükmi’l-kefâleti müdde‘î-i mersûm Kiragos zimmîye edâsıyla merkūm Hasan Efendi ilzâm olunduğu İstanbul Mahkemesi’nden huzûr[-ı âlîlerine i‘lâm olundu] Fî 9 L sene 1258