İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 524 Hüküm no: 459 Orijinal metin no: [179-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Nabi Efendi’nin borcunu ödemesi Ma‘rûz Bâ‘isü’l-i‘lâm Alacacı Perhîzoğlu? Ohannes v. Mizre zimmî meclis-i şer‘-i enverde teba‘adan es-Seyyid Abdullah Nabi Efendi b. el-Hâc Mehmed muvâcehesinde benim tüccârdan gāib ani’l-beled İskilibli Sarı Mustafa Ağa b. Osman zimmetinde cihet-i deyn-i şer‘îden bâ-i‘lâm-ı şer‘î mahkûmü- bih on bir bin beş yüz guruşdan bâkī on bin yedi yüz elli guruş alacak hakkım olup gāib-i mezbûr Sarı Mustafa Ağa işbu sene-i mübâreke Şa‘bâni’l-mu‘azzamı’nın on beşinci günü beni deyn-i mezkûruyla mezbûr es-Seyyid Abdullah Nabi Efendi üzerine üçümüz bir mahâlde iken havâle-i mutlaka-i sahîha-i şer‘iye ile havâle ve her birimiz havâle-i mezkûreyi ba‘de’l-kabûl meblağ-ı muhâlün- bih-i merkūm on bin yedi yüz elli guruşu târih-i merkūmdan yüz yirmi bir gün tamamında bana tamamen edâ ve teslîm etmek üzere mezbûr es-Seyyid Abdullah Nabi Efendi’yi tecîl eylediğimde ol dahi kabûl ve ber-vech-i muharrer edâ-i deyne ta‘ahhüd ve meblağ-ı merkūm cihet-i mezkûreden zimmetinde bana deyni olduğunu ikrâr ve ber-vech-i muharrer ikrârını nâtık ve deyn-i merkūmu müeccelen edâya ta‘ahhüdünü müştemil ve târih-i merkūm ile müverrah işbu bir kıt‘a deyn tahvîlini dahi yedime i‘tâ etmekle meblağ-ı merkūm on bin yedi yüz elli guruşu ecel-i mezkûr hulûlünde bi-hükmi’l-havâle bana edâ ve teslîme mezbûr Abdullah Nabi Efendi’ye tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı merkūm on bin yedi yüz elli guruşun ecel-i mezkûr hulûlünde müdde‘î-i mersûm Ohannes zimmîye bi-hükmi’l-havâle edâsıyla merkūm Abdullah Nabi Efendi ilzâm olunduğu [180] İstanbul Mahkemesi’nden huzûr-ı âlîlerine i‘lâm olundu. Fî 11 L sene 1258