İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 525 Hüküm no: 460 Orijinal metin no: [180-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Haçador v. Sahak’ın Yazmacı Arakil’e olan borcunun vârislerinden tahsili [Ma‘rûz] Arzuhâl eden Yazmacı Arakil v. Ohannes zimmî bi’l-ma‘iyye rü’yete memûr Evkāf Müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından mürsel Kâtib es-Seyyid Ebûbekir Şeref Efendi hâzır olduğu hâlde meclis-i şer‘-i hatîrde derûn-ı arzuhâlde isimleri mastûr Zümrüt bt. Haçador Nasrâniye tarafından husûs-ı âti’l-beyânda vekîl-i müsecceli mu‘arrefetü’ş-şahs Hağa? bt. Kigork Nasrâniye ile müvekkile-i mersûmenin sadrî kebîr oğulları Karabet ve Gabril zimmîler ve kebîre kızları kezâlik şahısları mu‘arrefeler Aranik ve Sara ve Maryem Nasrâniyeler evlâdü’l-hâlik Haçador v. Sahak zimmî muvâcehelerinde cennet-mekân merhûm ve mağfiret-nişân hazret-i Sultan Bâyezid Han -aleyhi eltâfü Rabbihi’l-Mennân- evkāf-ı celîleleri kāimmakām-ı mütevellîsi ecille-i ricâl-i Devlet-i aliyyeden hâlâ Evkāf-ı Hümâyûn Nâzırı sa‘âdetlü atûfetlü Mustafa Kânî Beyefendi taraflarından mürsel vekîlleri Câbî-i vakıf Hüseyin Gālib Efendi b. el-Hâc Mehmed hâzır olduğu hâlde müvekkile-i mersûme Zümrüd Nasrâniye ve zevci ve mersûmûn Karabet ve Gabril zimmîler ve Aranik ve Sara ve Maryem Nasrâniyelerin babaları hâlik-i mersûm Haçador zimmî sağlığında bâ-temessük-i mütevellî bi’l-icâreteyn münâsafeten mutasarrıf oldukları evkāf-ı celîle-i mezkûre müsakkafâtından Havâss-ı Refî‘a kazâsına muzâfe kasaba-i Hasköy’de Çıksalın nâm mahâlde kâin ma‘lûmü’l-hudûd fevkānî ve tahtânî dört bâb odayı müştemil bir bâb vakıf menzili bin iki yüz kırk dokuz senesi Saferi’l-hayrının yirmi dokuzuncu günü mâlımdan ve yedimden mâ‘an karz aldıkları beş bin guruş deynleri mukābelesinde bana vefâen bâ-re’y-i mütevellî ferâğ ve tefvîz ve teslîm ettiklerinde ben dahi ber-vech-i muharrer tefevvüz ve tesellüm ve kabûl ettiğimden sonra mesfûr Haçador zimmî meblağ-ı mezkûr beş bin guruşun nısfı olup kendiden iktizâ eden iki bin beş yüz guruşu bana edâ ile menzil-i mezkûrdan ber-minvâl-i muharrer mutasarrıf olduğu nısf hisse-i şâyi‘ayı tahlîs ve zabt etmeksizin bin iki yüz elli bir senesi hilâlinde hâlik olmuş idi el-hâletü hâzihî ben deyn-i merkūm beş bin guruşun üç bin guruşunu rızâmla hatt ü tenzîl etmemle bâkīsi olan iki bin guruşu bana edâ birle menzil-i mezkûru bâ-re’y-i mütevellî geri tefevvüz ve babaları hâlik-i mersûmdan intikāl ile zabta müvekkile ve asıl-ı mersûmûn Zümrüd Nasrâniye ve Karabet ve Gabril zimmîler ve Aranik ve Sara ve Maryem Nasrâniyelere tenbîh olunmak murâdımdır deyü da‘vâ ettikde vekîl-i mersûme Hağa Nasrâniye <> ve asıl-ı mersûmûn Karabet ve Gabril zimmîler ve Aranik ve Sara ve Maryem Nasrâniyeler dahi cevâblarında kaziyye minvâl-i meşrûh üzere olduğunu her biri tâyi‘an ve kat‘iyyen bi’l-asâle ve bi’l-vekâle ikrâr ü i‘tirâf ve meblağ-ı bâkī-i merkūm iki bin guruşu dahi müdde‘î-i mersûm Arakil zimmîye edâ ile menzil-i mezkûru bâ-re’y-i mütevellî ber-vech-i muharrer geri tefevvüz ve zabta asâleten ve vekâleten ta‘ahhüd eyledikleri İstanbul Mahkemesi’nden huzûr-ı [âlîlerine i‘lâm olundu] Fî 11 L sene 1258