İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 528 Hüküm no: 462 Orijinal metin no: [181-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedik yumurtacı dükkânının kullanımında anlaşma sağlandığı Yumurtacı gediği muhâyâsı [Ma‘rûz] Sâhibetü- arzuhâl Cemile Kadın bt. Abdullah ve hurresi Şerife Âdile Rafia Hanım bt. Es-Seyyid Osman’ın hâlâ zevcleri ve ve taraflarından husûs-ı âti’l-beyânda vekîlleri olduğu zâtlarını ârifân İsmail Efendi b. Mehmed ve Veliyüddin Efendi [b.] Mustafa nâm kimesneler şehâdetleriyle ber-nehc-i şer‘î sâbit olan Mâliye Hazîne-i celîlesinde Rumeli mukayyidi Mustafa Nuri Efendi b. Ali bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde meclis-i şer‘-i münîrde yumurtacı esnâfından derûn-ı arzuhâlde mezkûrü’l-ism Ali Ağa b. İbrahim muvâcehesinde esnâf-ı mezkûre Kethudâsı Ömer ve esnâf-ı mezkûreden sâir mazbûtü’l-esâmî kimesneler hâzır oldukları hâlde İstanbul hısnı ebvâbından Hatabkapısı hâricinde keresteci dükkânı karşısında kebeci ve duhâncı dükkânları beynlerinde vâki‘ bir bâb yumurtacı dükkânı derûnunda mevcûde beyne’l-esnâf gedik ta‘bîr olunur Haremeyn-i Muhteremeyn evkāfı müstegallâtından âlât-ı lâzıme-i ma‘lûmenin nısf hisse-i şâyi‘ası zevcelerim ve müvekkilelerim mezbûretân Cemile Kadın ve Şerife Âdile Rafia Hanım’ın seviyyen ve nısf hisse-i şâyi‘a-i âharı dahi mezbûr Ali Ağa’nın müstakıllen bâ-temessük-i mütevellî bi’l-icâreteyn taht-ı tasarruflarında olup ben mezbûr Ali Ağa ile ber-vech-i muharrer mutasarrıf oldukları âlât-ı lâzıme-i merkūmu işbu târih-i i‘lâmdan i‘tibâr ile evvelen bir sene tamamına değin mezbûr Ali Ağa müstakıllen ve ba‘dehû bir sene dahi müvekkilelerim mezbûretân bi’l-ma‘iyye müstakılleten zabt u tasarruf etmek üzere bi’t-terâzî asâleten ve vekâleten akd-i muhâyât edip her biri âharın nevbet-i tasarrufuna müdâhale ve ta‘arruz etmemek üzere tarafeynden her birimiz bi’l-asâle ve bi’l-vekâle ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 8 Receb sene 1258