İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 529 Hüküm no: 463 Orijinal metin no: [181-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Arif Efendi’nin borcunu ödemesi 350 [guru]şa sulh Sâhib-i arzuhâl Makaracı Hasan Ağa b. Ali meclis-i şer‘-i münîrde derûn-ı arzuhâlde mezkûrü’l-ism Mengene Kâtibi Mehmed Ârif Efendi b. Hüseyin muvâcehesinde bin iki yüz elli beş senesi hilâlinde mezbûr Mehmed Ârif Efendi’nin hâlâ zevcesi gāibetü ani’l-meclis Âişe Hatun’un mutasarrıfe olduğu İstanbul’da Çarşı-yı kebîr’de Marpuşcular sûkunda kâin biribirine muttasıl iki bâb püskülcü dükkânları ile yine İstanbul’da Drağman civârında Kâtib Muslihiddin mahallesinde kâin bir bâb menzilin ta‘mîr ve termîmlerine ve zevci mezbûr Mehmed Ârif Efendi’nin sâir umûr-ı ma‘lûmesine zevci mezbûrun bi-şarti’r-rücû‘ emriyle bâ-defter-i müfredât masrûfum olan bin yüz kırk altı guruş mezbûr Mehmed Ârif Efendi’den bi’l-mürâca‘a hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr ile kat‘a li’n-nizâ‘ üç yüz elli guruş üzerine bi’t-terâzî ba‘de akdi’l-musâlaha ve’l-kabûl bedel-i sulh-ı mezkûr üç yüz elli guruşu dahi bana edâ ve teslîme mezbûr Mehmed Ârif Efendi ta‘ahhüd etmekle bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlümüzü hâvî ibrâ-i sahîh ile ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 11 L sene 1258