İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 530 Hüküm no: 464 Orijinal metin no: [181-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosko v. Yanaki ile Hecioğlu Yanako arasındaki alacak verecek davasının sulh ile neticelendiği İhrâc-şüd fî 24 [?] sene [12]60 Bir tarafdan bin üç yüz [guru]ş hüküm ve bir tarafdan 500 [guru]şdan meccânen fâriğ [Ma‘rûz] Tüccârdan olup arzuhâl eden Mosko v. Yanaki nâm zimmî İstanbul Mahkemesi’nde meclis-i şer‘-i hatîrde Havâss-ı Refia kazâsına muzâfe Çatalca nâhiyesine tâbi‘ Sorgun karyesi mütemekkinlerinden derûn-ı arzuhâlde ismi mastûr Acioğlu Yanako v. Anaştaş nâm zimmî muvâcehesinde karye-i mezkûre ahâlisinden ma‘lûmü’l-esâmî kimesnelerden benim için keten tohumu ahz u kabz ve bana teslîm etmek üzere mersûm Yanako zimmîye milâd-ı hazret-i İsa’nın bin sekiz yüz kırk iki senesi Mayısı ibtidâsında mâlımdan iki bin üç yüz guruş def‘ ü teslîm ve tarafımdan mersûmu tevkîl eylediğimde ol dahi ber-vech-i muharrer ahz ü kabûl ve ancak bin guruşunu beher kilesi yirmi beşer guruşa olarak benim için iştirâ ve kabz ve bana teslîm ettiği kırk keyl keten tohumu semenlerine verip bâkīsi olan bin üç yüz guruşu bi-gayrı hakkın kendi umûruna sarfla istihlâk etmekle meblağ-ı bâkī-i mezkûr bin üç yüz guruşu mersûm Yanako zimmîden hâlâ tazmîn taleb ederim deyü ba‘de’d-da‘vâ ve’l-istintâk ol dahi cevâbında meblağ-ı bâkī-i merkūm bin üç yüz guruş minvâl-i muharrer üzere müdde‘î-i mersûm Mosko zimmîye zimmetinde damânen deyni olduğunu ikrâr lâkin benim müdde‘î-i mersûm Mosko zimmî zimmetinde beher kilesi yirmi beşer guruşa olmak üzere bundan akdem mâlımdan ve yedimden iştirâ ve kabz eylediği yirmi keyl keten tohumu semeninden beş yüz guruş alacak hakkım olmağla meblağ-ı mezkûr beş yüz guruş deynim olan meblağ-ı mezkûr bin üç yüz guruşdan takasan tenzîl olunmak matlûbumdur deyü müdde‘î-i mersûmun inkârına mukārin mersûm Yanako zimmî tasaddî eylediği meblağ-ı mezkûr beş yüz guruşdan rızâsıyla meccânen fâriğ olup meblağ-ı merkūma müte‘allika da‘vâdan mersûm Mosko zimmînin zimmetini kabûlünü hâvî ibrâ ve iskāt etmekle mûcebiyle mersûm Yanako zimmînin sâlifü’l-beyân mukırr u mu‘terif olduğu meblağ-ı bâkī-i mezkûr bin üç yüz guruşu damânen müdde‘î-i mersûm Mosko zimmîye edâ ve teslîme mersûm Yanako zimmîye tenbîh olunduğu huzûr-ı [âlîlerine i‘lâm olundu] Fî 13 L sene 1258