İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 530 Hüküm no: 465 Orijinal metin no: [182-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın kocası Mehmed Nuri Ağa’dan muhâlaa yoluyla boşandığı Muhâla‘a [Ma‘rûz] İstanbul’da Sofular mahallesinde sâkine bâ‘isetü’l-i‘lâm mu‘arrefetü’z-zât Şerife Hatice Hatun bt. Mehmed Salih vâlidesi kezâlik zâtı mu‘arrefe Şerife Âlime Hatun bt. eş-Şeyh Mehmed Celaleddin hâzıra olduğu hâlde meclis-i şer‘-i münîrde mezbûre Şerife Hatice Hatun’un zevc-i muhâlı‘ı teba’adan es-Seyyid Mehmed Nuri Ağa b. Hüseyin muvâcehesinde mezbûr es-Seyyid Mehmed Nuri Ağa beş yüz elli bir guruş mehr-i müeccel tesmiyesiyle zevc-i dâhilim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan meblağ-ı mezkûr beş yüz elli bir guruş mehr-i müeccel ile nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile hul‘ olduğumdan ol dahi hul‘-ı mezkûru ba‘de’l-kabûl ancak hukūk-ı zevciyete müte‘allika da‘vâdan tarafeynden her birimiz âharın zimmetini kabûlümüzü hâvî ibrâ-i sahîh-i şer‘î ile ibrâ ve iskāt eylediğimizden mâ‘adâ zevc-i muhâlı‘ım mezbûr Mehmed Nuri Ağa vâlidem hâzıra-i mezbûre Şerife Âlime Hatun’dan mahalle-i mezbûrede vâki‘ mutasarrıf olduğun bir bâb menzilin ta‘mîr ve termîmine bi-şarti’r-rücû‘ emrinle mâlımdan üç bin guruş harc ü sarf etmiş idim deyü tasaddî eylediği meblağ-ı mezkûr üç bin guruşdan rızâsıyla meccânen fâriğ olup meblağ-ı merkūma müte‘allika âmme-i da‘vâdan vâlidem hâzıra-i mezbûrenin zimmetini kabûlüne mukārin ibrâ ve iskāt edip bu vechile kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 9 L sene 1258