İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 531 Hüküm no: 466 Orijinal metin no: [182-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Halil Ağa’nın Dülger Barten’e olan borcunu ödemesi 350 [guru]şa sulh ve ibrâ Ma‘rûz Dülger kalfalarından arzuhâl sâhibi Papasköprülü Bartan v. Ohannes zimmî İstanbul Mahkemesi’nde meclis-i şer‘-i hatîrde mahrûse-i Galata’ya muzâfe kasaba-i Kasımpaşa’da el-Hâc Hüsrev mahallesinde sâkin derûn-ı arzuhâlde mezkûrü’l-ism Keresteci es-Seyyid el-Hâc Halil Ağa b. es-Seyyid Mustafa muvâcehesinde mezbûr es-Seyyid el-Hâc Halil Ağa hâlâ kayınvâlidesi gāibetü ani’l-meclis Habibe Hatun bt. Mehmed’in mutasarrıfe olduğu mahalle-i mezkûrede vâki‘ üç bâb odayı müştemil bir bâb menzilini işbu sene-i mübâreke Recebi’l-ferd’i hilâlinde müceddeden binâ ettikde iktizâ eden rençber ve sıvacı ücretlerine mezbûr es-Seyyid el-Hâc Halil Ağa’nın bi-şarti’r-rücû‘ emriyle mâlımdan bâ-defter medfû‘um olan dört bin yetmiş buçuk guruşun bin beş yüz guruşunu edâ ve teslîm etmekle bâkīsi olan iki bin beş yüz elli buçuk guruşu dahi mezbûr es-Seyyid el-Hâc Halil Ağa’dan bi’l-mürâca‘a hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm ile bi’t-tav‘ ve’r-rızâ üç yüz <> elli guruş üzerine ba‘de akdi’l-musâlaha ve’l-kabûl bedel-i sulh-ı mezkûr üç yüz elli guruşu dahi bana edâya mezbûr es-Seyyid el-Hâc Halil Ağa ta‘ahhüd etmekle bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini kabûlümüzü hâvî ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 12 L sene [12]58