İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 532 Hüküm no: 467 Orijinal metin no: [182-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü dükkânı gediğinin satışı Tütüncü istidâsı [Ma‘rûz] İstanbul’da Hasanpaşa Han’ı civârında Mimar Kemaleddin mahallesi sâkinlerinden ve Dîvân-ı Hümâyûn Kalemi ketebesinden es-Seyyid Ahmed İzzet Efendi b. es-Seyyid Halil meclis-i şer‘-i münîrde Mesârifât Hazîne-i Celîlesi’nde sâbıkā sergi halîfesi bâ‘isü’l-i‘lâm Mehmed Said Efendi b. el-Hâc Mehmed tarafından husûs-ı âti’l-beyânda vekîl-i şer‘îsi teba’adan ibrahim Ağa b. Ali muvâcehesinde takrîr-i kelâm edip mahalle-i mezkûrede Çinilifırın karşısında menzil tahtında vâki‘ ma‘lûmü’l-hudûd Eshâm Muhâsebesi’nden Abdullah Ağa ismine mukayyed bir bâb tütüncü dükkânı derûnunda mevcûde beyne’l-esnâf gedik ta‘bîr olunur tedâvül-i [eyâdî] ile akd-i âti’z-zikrin sudûruna değin bâ-hüccet müstakıllen yedimde mülküm olan âlât-ı lâzıme-i ma‘lûmeyi tarafeynden bi’l-îcâb <> ve’l-kabûl bey‘-i bâtt-ı sahîh-i şer‘î ve safka-i vâhide ile müvekkil-i mûmâ-ileyh Mehmed Said Efendi’ye beş bin guruş semen-i medfû‘ ve makbûza bey‘ ve temlik ve teslîm eylediğimde ol dahi iştirâ ve temellük ve tesellüm ve kabz u kabûl etmeğin min-ba‘d âlât-ı gedik-i merkūmda benim aslâ ve kat‘a alâka ve medhalim kalmayıp müvekkil-i mûmâ-ileyh Mehmed Said Efendi’nin müstakıllen mülk-i müşterâsı ve hakk-ı sırfı olmağla bey‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlümüzü hâvî ibrâ ve iskāt eyledik deyü ba‘de’l-ikrâr ve’t-tasdîk vekîl-i mezbûr ibrahim Ağa meclis-i şer‘de tütüncü esnâfının kethudâ vekîli ve yazıcısı Mehmed Emin Efendi ve yiğitbaşısı el-Hâc Hasan Ağa ve sâir mazbûtü’l-esâmî lonca ihtiyârları hâzır oldukları hâlde bi’l-vekâle takrîr-i kelâm edip müvekkilim mûmâ-ileyh Mehmed Said Efendi’nin ber-vech-i [183] meşrûh şirâen mâlik olduğu gedik-i mezkûrun kaleminden merkūm Abdullah Ağa üzerinde olan kayd-ı atiki ref‘ ü terkīn ve müvekkilim mûmâ-ileyh ismine tashîhan kayd ile kaleminden müceddeden yedine bir kıt‘a sûret i‘tâsı bi’l-vekâle niyâz ederim dedikde fi’l-vâki‘ gedik-i mezkûr merkūm Abdullah Ağa’nın ismine mukayyed ve taht-ı nizâmda dâhil ve mu‘teber gedik olduğunu ve bu makūle mukayyed tütüncü gediklerinin kayd olunan ta‘arruz olunmayarak tedâvül-i eydî ile mu‘ahharan mâlikleri isimlerine tashîhan bâ-i‘lâm kaleminden müceddeden sûret i‘tâsı şurût ve nizâmlarından idiğini esnâf-ı hâzırûn-ı mezbûrûn ihbâr etmeleriyle bu sûretde ber-vech-i istid‘â merkūm Abdullah Ağa ismine olan kaydı ref‘ ü terkīn ve müvekkilim mûmâ-ileyh Mehmed Said Efendi b. el-Hâc Mehmed ismine tashîhan kayd ile yedine bir kıt‘a sûret i‘tâsı muktezâ-yı şurût ve nizâm idiği İstanbul Mahkemesi’nden huzûr-ı [âlîlerine i‘lâm olundu] Fî 14 L sene 1258