İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 533 Hüküm no: 469 Orijinal metin no: [183-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstirati v. Erkiros’un Şerbetçi Haci Vasil’den alacaklı olduğu yolundaki iddiasını ispatlayamadığı [Ma‘rûz] Vilâyet-i Rumeli’de Gelibolu sancağında Şarköyü Kazâsı re‘âyâsından derûn-ı arzuhâlde ismi mastûr İstirati v. Erkiros zimmî meclis-i şer‘-i münîrde yine kazâ-i mezkûr re‘âyâsından ve şerbethâneci tâifesinden arzuhâl sâhibi Vasil v. Kiryako zimmî muvâcehesinde mersûm Vasil zimmînin yedinde olup işbu meclis-i şer‘de ibrâz eylediği işbu sene-i mübâreke Şa‘bâni’l-mu‘azzamı’nın on sekizinci günü târihiyle müverrah ve hâlâ İstanbul Bâb Mahkemesi Nâibi müderrisîn-i kirâmdan es-Seyyid Ahmed Efendi’nin hâtemiyle mahtûm bir kıt‘a i‘lâm-ı şer‘î nâtık olduğu üzere ben târih-i merkūmda nâib-i mûmâ-ileyh huzûrunda mesfûr Vasil zimmî ile terâfu‘larımızda mersûm Vasil zimmî zimmetinde târih-i merkūmdan sekiz ay mukaddem mâlımdan ve yedimden ikrâz ve kabz ve umûruna sarfla istihlâk eylediği yedi yüz yirmi iki guruş ve kezâlik mâlımdan ve yedimden iştirâ ve kabz eylediği ma‘lûmü’z-zirâ‘ ve’l-fiyât şeytân bezi semeninden sekiz yüz elli guruş ve yine mâlımdan ve yedimden iştirâ ve kabz eylediği ma‘lûmü’l-aded ve’l-fiyât fıçı semeninden dahi bin yüz yirmi guruş ki cem‘an iki bin altı yüz doksan iki guruş alacak hakkım olmağla hâlâ taleb ederim deyü da‘vâ eylediğimde ol dahi cevâbında işbu sene-i mübâreke-i mezkûrede duhûl eden Nisan’ın on beşinci günü seninle meblağ-ı mecmû‘ ile sâir beynimizde cârî ahz u i‘tânın hesâbını rü’yet eylediğimizde senin benim zimmetimde kat‘a alacak hakkın zuhûr etmemekle bi’l-cümle husûs-ı mezkûra ve târih-i mezkûra gelince cemî‘ hukūk-ı şer‘iyeye müte‘allika âmme-i de‘âvîden benim zimmetimi kabûlümü hâvî ibrâ ve iskāt edip hattâ yedimde olan sene-i mübâreke Şa‘bâni’l-mu‘azzamı’nın üçüncü günü târihiyle müverrah ve kazâ-i mezkûr Nâibi es-Seyyid Ebûbekir’in hâtemiyle mahtûm bir kıt‘a i‘lâm-ı şer‘î nâtık olduğu üzere sen husûs-ı mezkûr için isdâr ettirdiğin bir kıt‘a mektûb-ı sâmî-i hazret-i Sadâret-penâhî mûcebince seninle nâib-i mûmâ-ileyh huzûrunda lede’t-terâfu‘ ibrâ-i mezkûru bi-tamamihi ikrâr eylediğinden da‘vâ-yı mezkûrenle bana bî-vech mu‘ârazadan men‘ dahi olunmuş idin deyü eylediği def‘ini ikrâr ve tasdîk edip mûcebince ben da‘vâ-yı mezkûremle mesfûr Vasil zimmîye bî-vech-i şer‘î mu‘ârazadan men‘ olunup kıbel-i şer‘den minvâl-i muharrer üzere işbu bir kıt‘a i‘lâm-ı şer‘î mersûm Vasil zimmî yedine i‘tâ olundukdan sonra sene-i mübâreke-i merkūmede duhûl eden Eylül’ün yirmi birinci günü İstanbul’da Ayazmakapısı dâhilinde vâki‘ berber dükkânında mersûm Vasil zimmî bana eğer sen iki bin üç yüz sekiz guruş bana karz verir isen ben dahi meblağ-ı mezkûr iki bin üç yüz sekiz guruş ve ber-mûceb-i i‘lâm mütâlebesiyle men‘ olunduğun iki bin altı yüz doksan iki guruş ki cem‘an beş bin guruş zimmetimde sana deynim olduğunu ikrâr ve yedine bir kıt‘a tahvîl dahi veririm dedikde ben dahi mâlımdan mersûm Vasil zimmîye iki bin üç yüz sekiz guruş karz verip ol dahi yedimden ber-vech-i muharrer ahz u kabz ve meblağ-ı merkūm iki bin üç yüz sekiz guruş ve ber-vech-i muharrer men‘ olunduğum iki bin altı yüz doksan iki guruş ki cem‘an beş bin guruş zimmetinde bana deyni olduğunu ikrâr ve târih-i merkūm ile müverrah Rumiyyü’l-imlâ işbu bir kıt‘a tahvîli dahi yedime vermekle meblağ-ı mecmû‘-ı merkūm beş bin guruşu mersûm Vasil zimmîden hâlâ taleb ederim deyü da‘vâ ettikde evvelen takrîr-i meşrûhu üzere iki bin altı yüz doksan iki guruş da‘vâsı meşrû‘a olmayıp mâ‘adâ müdde‘âsında mersûm Vasil zimmî istintâk olundukda cevâbında inkâr etmekle müdde‘î-i mersûm İstirati zimmî mâ‘adâ müdde‘âsını dahi lede’l-istimhâl ve’l-imhâl müddet-i mehl-i şer‘î mürûr edip bir vechile şâhid-i âdil ikāmesiyle isbâta kādir olmamağla talebiyle mersûm Vasil zimmîye bi’l-muvâcehe ber-nehc-i şer‘î yemîn verilmeğin mûcebince müdde‘î-i mersûm İstirati zimmî da‘vâ-yı mezkûreleriyle mersûm Vasil zimmîye bilâ-beyyine ve bî-vech-i şer‘î mu‘ârazadan men‘ olunduğu ve müdde‘î-i mersûmun tasaddî eylediği iki bin üç yüz sekiz guruş da‘vâ-yı mezkûresinden murâdı dahi mücerred celb-i mâl sevdâsıyla mersûm Vasil zimmîyi tecrîm ve ol-vechile da‘vâ-yı mezkûresinden dahi tezvîr münfehim olduğundan müdde‘î-i mersûm İstirati zimmî fîmâ-ba‘d da‘vâ-yı mezkûresiyle tekrar tasaddî etmemek üzere müdde‘î-i mersûma tenbîh ve eğer mütenebbih olmayıp husûs-ı mezkûra tekrar ictisâr eder ise iktizâ eden tedîbi icrâ olunacağı kendine tefhîm olunduğu İstanbul Mahkemesi’nden huzûr-ı [âlîlerine i‘lâm olundu] Fî 18 L sene 1258