İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 544 Hüküm no: 478 Orijinal metin no: [187-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koskalı Karagöz ile Aksaraylı Yorgi’nin, Bakkal Anaştaş’ın Halil Efendi’ye olan borcuna kefil oldukları Tecîl ve kefîle rabt [Ma‘rûz] Bakkāl tâifesinden Anaştaş v. İlya zimmî İstanbul Mahkemesi’nde meclis-i şer‘-i hatîrde eşrâf-ı kuzâtdan bâ‘isü’l-i‘lâm es-Seyyid Halil Efendi b. es-Seyyid Mehmed Sadık muvâcehesinde tâife-i mezkûreden Koskalı Karagöz v. Şenik ve Aksaraylı Yorgi v. Nikola zimmîler hâzır oldukları hâlde İstanbul’da Tavukpazarı kurbünde Hüseyinağa mahallesinde kâin Yenidükkân demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-hıref gedik ta‘bîr olunur Evkāf-ı Haremeyn-i Muhteremeyn müstegallâtından âlât-ı lâzıme-i ma‘lûmenin yüz yirmi sehm i‘tibârıyla bâ-temessük-i mütevellî bi’l-icâreteyn mutasarrıf olduğum yirmi iki buçuk sehm hisse-i şâyi‘asını bin iki yüz elli bir senesi Cemâziyelevvel’isinin on beşinci günü mezbûr es-Seyyid Halil Efendi’nin mâlından ve yedinden karz aldığım dört bin guruş deynim mukābelesinde mezbûr es-Seyyid Halil Efendi’ye vefâen bâ-re’y-i mütevellî ferâğ ve tefvîz ve vech-i lâyıkı üzere teslîm eylediğimde ol dahi ber-vech-i muharrer tefevvüz ve tesellüm ve kabûl etmiş idi el-hâletü hâzihî dâyinim mezbûr deyn-i merkūm dört bin guruşun bin guruşunu hatt ü tenzîl edip ben dahi mezbûr es-Seyyid Halil Efendi’den deyn-i merkūm dört bin guruşun bilâ-devr-i şer‘î murâbahası nâmıyla târih-i merkūmdan berü beher şehr altmış altışar guruşdan mâlımdan cem‘an beş bin sekiz yüz yetmiş dört guruşumu bi-gayrı hakkın ahz u kabz ve istihlâk etmiş idin deyü inkârına mukārin tasaddî eylediğim meblağ-ı mecmû‘-ı müstehlek-i merkūm beş bin sekiz yüz yetmiş dört guruşdan fâriğ olup meblağ-ı mecmû‘-ı müstehlek-i merkūma müte‘allika âmme-i da‘vâdan mezbûr es-Seyyid Halil Efendi’nin zimmetini kabûlünü hâvî ibrâ-i sahîh-i şer‘î ile ibrâ ve iskāt eylediğimden mâ‘adâ kendine bâkī deynim olan iki bin beş yüz guruşu dahi işbu târih-i i‘lâmdan on bir gün tamamına değin edâ ile yirmi iki buçuk sehm hisse-i şâyi‘a-i merkūmeyi bâ-re’y-i mütevellî geri tefevvüze ta‘ahhüd edip ve meblağ-ı bâkī-i merkūm iki bin beş yüz guruşa hâzırân-ı mersûmân Karagöz ve Yorgi zimmîlerden her biri dahi tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile başka başka kefîl ve zâmin oldular deyü mersûm Anaştaş zimmînin sâdır olan bi’l-cümle takrîr-i meşrûhunu merkūm es-Seyyid Halil Efendi ile hâzırân-ı mersûmân Karagöz ve Yorgi zimmîlerden her biri tasdîk ve tahkīk eyledikleri tescîl ve huzûr-ı [âlîlerine i‘lâm olundu] Fî 21 L sene 1258