İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 547 Hüküm no: 480 Orijinal metin no: [187-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da satılacak sığır etinin fiyatının belirlendiği Fiât-ı lahm-ı sığır Ma‘rûz Yedikule’de vâki‘ sığır kasabı esnâfı bir müddetden berü celeb tâifesinden sığır luhûmunu beher vakıyyesi altmış sekizer paraya olmak üzere iştirâ ve üzerine altışar para ticâret zammıyla beher vakıyyesini narh-ı cârîsi olan yetmiş dört paraya ibâdullâha bey‘ ede gelirler iken işbu sene-i mübârekede her bir vakıyyede dört parası tenzîl olunup beher vakıyyesini yetmişer paraya ibâdullâha bey‘ etmek üzere tenbîh <> olunduğundan celeb tâifesi dinlemeyip medyûn ve perîşânü’l-hâl olduklarına binâen kemâ-kân beher vakıyyesini yetmiş dört paraya bey‘ etmeleri husûsuna müsâ‘ade buyurulmak bâbında işbu arzuhâlleriyle istid‘â ettiklerinde husûs-ı mezkûr bâ-emr-i âlî ihtisâb nâzırı sa‘âdetlü atûfetlü beyefendiye havâle olundukda onlar dahi hasbe’l-îcâb lahm-ı sığırın fiyâtından dört para tenzîl olunmuş olduğunu hâmiş-i arzuhâlde mastûr olduğu üzere i‘lâm ettiklerinde işbu i‘lâmda beyân olunduğu vechile sa‘âdetlü ağnâm müdîri beyefendi ile bi’l-müzâkere iktizâ-yı tesviyesine himmet eyleyesin deyü arzuhâl-i mezkûre sâdı[r] olan emr-i âlîlerine imtisâlen hâlâ ağnâm müdîri el-Hâc Hüseyin Hüsam Efendi meclis-i şer‘a celb ve zikr olunan sığır kasabı esnâfından Hafız Ali Ağa ve Mehmed Ağa ve Kasımpaşalı Ahmed Ağa ve Üsküdarlı Ahmed Ağa ve Galatalı el-Hâc Osman Ağa nâm kimesneler ve Balatlı Mosi nâm Yahûdî dahi mevcûdlar iken kasablar kethudâsı es-Seyyid Mehmed Bey ve Yedikule ve Eğrikapı’da vâki‘ ağnâm kasabı ustalarından el-Hâc Hasan Ağa ve el-Hâc Mahmud Ağa ve Mehmed Ağa ve sâir mazbûtü’l-esâmî kimesneler hâzır oldukları hâlde husûs-ı mezkûr müdîr-i mûmâ-ileyh ile müzâkere olundukda sığır kasabı esnâfı mezbûrûnun yedlerine olup ibrâz eyledikleri bin iki yüz elli beş senesi Cumâdelâhiresi gurresi târihiyle müverrah İstanbul Mahkemesi’nden verilen bir kıt‘a i‘lâm nâtık olduğu üzere esnâf-ı merkūme celeb tâifesinden sığır luhûmunu ve içyağını beher vakıyyesi altmış sekizer paraya ve cülûdu ve sakatının beherini yirmi dörder guruşa ve beynlerinde döndürme ta‘bîr olunur her bir re’sde dokuz guruş esnâf-ı merkūme üzerlerine olmak üzere iştirâ ve luhûmun fî-i mezkûru üzerine altışar para ticâret zammıyla beher vakıyyesini narh-ı cârîsi olan yetmiş dörder paraya ibâdullâha bey‘e ta‘ahhüd edip minvâl-i muharrer üzere bey‘ ede gelirler iken fî-i merkūmun dört parası ber-vech-i muharrer tenzîl olunduğundan taşrada celeb tâifesi dahi noksâna veremeyeceklerinden sığır getirmeyip esnâf-ı merkūme bir takım mesârif ile mahallerine giderek bi’l-iştirâ Âsitâne-i sa‘âdet’e getirdiklerini sığır luhûmunu beher kıyyesini yetmişer paraya olarak bey‘ eylediklerinden mutazarrır oldukları münfehim olduğundan mâ‘adâ esnâf-ı hâzırûn-ı mezbûrûn dahi ihbâr edip ve bu esnâda lahm-ı ganemin dahi fiyât-ı mukarreresine beş para zamla bâ-fermân-ı âlî doksan beş paraya iblâğ olunmağla bu sûretde celeb tâifesi zuhûr edip sığır getirinceye değin zikr olunan sığır luhûmunun fiyât-ı sâbıkāsı olan beher vakıyyesini yetmiş dörder paraya ibâdullâha bey‘lerine ruhsat verilmesini müdîr-i mûmâ-ileyh dahi tensîb etmeleriyle ashâb-ı arzuhâl-i mezbûrûnun ber-vech-i muharrer bey‘lerine müsâ‘ade buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî-selhi L sene 1258